Asanáli Áshimov pen Sábıt Dosanov Tuńǵysh Prezıdent stıpendııasyn aldy
75 ádebıet pen óner qaıratkerine memlekettik stıpendııa taǵaıyndaldy . Olardyń arasynda Asanáli Áshimov, Sábıt Dosanov, Nurǵalı Núsipjanov, Dýlat Isabekov jáne basqa da óner maıtalmandary bar.
Belgili jazýshy, Qazaqstan Respýblıkasyna eńbek sińirgen qaıratker Sábıt Dosanovtyń aıtýynsha, Tuńǵysh Prezıdent stıpendııasyn jylda alady.
«Bul stıpendııany alyp júrgenime 15 jyldan asty. Atalǵan marapat shyǵarmashylyq adamdaryna kerek dep oılaımyn. Moraldik jaǵynan bolsyn, materıaldyq jaǵynan bolsyn. Adamǵa jańa shyǵarma jazýǵa shabyt beredi. Til men mádenıetke memleket úlken kóńil bólip jatyr. Memleket basshysy men Elbasyna alǵysym sheksiz»,- deıdi qalamger.
Qazaqstannyń halyq ártisi, Memlekettik syılyqtyń laýreaty Asanáli Áshimov te - osy stıpendııanyń turaqty ıegeri.
«Osy stependııa paıda bolǵaly alyp jatyrmyn. Óner adamdaryna kóńil bólip otyrǵan Prezıdent Qasym-Jomart Toqaevqa rahmet. Pandemııaǵa qaramastan elde kóp sharýa atqaryldy. Abaıdyń 175 jyldyǵy halyqaralyq deńgeıde, joǵary dárejede atalyp ótti. Alash azamattaryn ulyqtap jatyrmyz, bul jaqsy. Ótkendi umytýǵa bolmaıdy. Ótkensiz keleshek joq. Árqashanda jaqsylyqqa umtylý kerek. Elimizde qýanysh pen toı kóp bolsyn»,-deıdi Asanáli Áshimov.
Aıta ketý kerek, stıpendııalar jyl saıyn Qazaqstannyń mádenıetiniń qurylýyna, saqtalýyna jáne damýyna qosqan úlesi úshin qurmetti ataqtar men memlekettik nagradalarmen marapattalǵan shyǵarmashylyq qyzmetkerleri men mádenıet qyzmetkerlerin memlekettik qoldaý maqsatynda beriledi.
Buǵan deıin QR Memlekettik hatshysy Qyrymbek Kósherbaev Qazaqstannyń halyq artısi, Memlekettik syılyqtyń laýreaty, M.Áýezov atyndaǵy Qazaq ulttyq akademııalyq drama teatrynyń akteri Sábıt Orazbaevqa І dárejeli «Barys» ordenin saltanatty túrde tabys etken bolatyn.
