Asanáli Áshimov aqtóbelik jas áriptesterine syn-eskertpeleri men keńesin aıtty
AQTÓBE. QazAqparat - M.Áýezov atyndaǵy Qazaq memlekettik akademııalyq drama teatry Aqtóbege gastroldik saparmen keldi. Baspasóz máslıhaty kezinde Qazaqstannyń eńbek eri Asanáli Áshimov Tahaýı Ahtanov esimin ıelengen Aqtóbe oblystyq drama teatrynyń dramatýrgtiń óz pesalaryn sahnalamaýyn synǵa aldy, dep habarlaıdy QazAqparat tilshisi.
M.Áýezov atyndaǵy Qazaq memlekettik akademııalyq drama teatry 1-5 mamyr aralyǵynda aqtóbelikterge «Akterdi óltirgen kim?», «Aqtastaǵy Ahıko», «Beıbarys sultan», «Syǵan serenadasy», «Tańsulý», «Qoshtasqym kelmeıdi» atty spektaklderin sahnalaıdy. Elbasy Nursultan Nazarbaevtyń «Bolashaqqa baǵdar: Rýhanı jańǵyrý» baǵdarlamasy aıasynda óńirlerdi aralaýǵa shyqqan teatr ujymy sońǵy 10 jylda Aqtóbege at izin salmaǵanyn aıtyp otyr. Shaqyrý bolmaǵan, usynys túspegen.
«Oblystardan shaqyrý bolsa, baramyz. Teatr bir-eki adamnyń shabadandy kóterip, jolǵa shyǵyp ketetin jumys emes. Kásibı teatr sahnadaǵy atmosferanyń 50-60 paıyzyn kóshirip ákelýi kerek. Dekoratsııa, kostıýmge jaýapty mamandar da keledi. Bir apta buryn eki júk kóligi Aqtóbege jolǵa shyqty. Barlyǵy 60-qa jýyq adam qonaqúıge qonystandy. Bárin qamtamasyz etý qıynǵa soǵady. Teatr paıda kózi emes, tabys ákelmeıdi. Rýhanı qundylyqtar ordasy qıyndyqtardy jeńip, aýdan, aýylǵa shyǵýǵa múmkindik bolady dep oılaımyz», - dedi drama teatr dırektory Ashat Maemırov.
Aqtóbege arnaıy kelgen akter Asanáli Áshimov jas ártisterine óz oı-pikirin, syn-eskertpelerin bildirdi. Akterdiń aıtýynsha, Ahtanov teatrynda jazýshy, dramatrýgtiń óz spektaklderin sahnalaý qajet. Osy sebepti aldaǵy ýaqytta teatrda Ahtanovtyń «Boran» pesasyn qoıý usynyldy.
«Ózim «Boran» spektaklinde oınadym. Aqtóbe teatry Tahaýı Ahtanovtyń atyn alady da, shyǵarmalaryn sahnalamaıdy. Mindetti túrde sahnalanýy tıis. Muhtar Áýezov teatry Áýezovtiń dramatýrgııasyna jıi barady. «Abaı», «Eńlik-Kebek», «Qarakózi» bar. Sondyqtan Ahtanov teatry mindetti túrde Ahtanovtyń shyǵarmalaryn qoıý kerek. Aty bar, shyǵarmalary joq. Bul durys emes»,- dedi Asanáli Áshimov.
