«Asan» Tashkentten júldemen oraldy
ASTANA. QazAqparat - «Qazaqfılm» kınostýdııasy túsirgen «Asan» fılmi Tashkentte ótken Halyqaralyq PROlogue kınofestıvalinde qazylar alqasynyń arnaıy júldesine ıe boldy, dep habarlaıdy QazAqparat tilshisi kınostýdııanyń baspasóz qyzmetine silteme jasap.
Atalmysh fılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen. Rejısseri - Berik Jahanov.
«Asan» fılmi festıvaldiń qysqametrajdy fılmderge arnalǵan konkýrstyq baǵdarlamasy sheńberinde kórsetildi. Kınotýyndy ákesin aqtyq saparǵa shyǵaryp salýǵa jolǵa shyqqan bozbala týraly baıandaıdy.
«Men óte qýanyshtymyn. Maǵan senip, qoldaý bildirgenderi úshin «Qazaqfılm» kınostýdııasynyń basshylyǵyna alǵysymdy aıtamyn. Bul júlde, men úshin, úlken motıvatsııa», - dedi marapattaý saltanatynda jas rejısser Berik Jahanov.
Jalpy festıvalge qatysýǵa 60 elden 280-nen astam ótinim kelip túsken. Nátıjesinde, konkýrstyq baǵdarlamaǵa 13 elden kelgen (AQSh, Polsha, Frantsııa, Túrkııa, Qazaqstan, Qyrǵyzstan jáne t.b.) 31 kınotýyndy iriktep alyndy.
Halyqaralyq qysqametrajdy fılmder konkýrsynyń qazylar alqasyn tanymal ózbek rejısseri Aıýb Shahobıddınov basqardy. Bul qazylar alqasynyń quramyna prodıýser Fabıo Kanepa (Italııa), akter Fılıpp Reınhardt (Shveıtsarııa), qoıýshy operator Maks Ttsýı (Germanııa), kınosynshy Gýlbara Tolomýshova (Kyrgyzstan) kirdi.
Aıta ketsek, halyqaralyq tolyqmetrajdy fılmder baıkaýynda qazylar alqasynyń quramyna otandyq tanymal rejısser Rústem Ábdirashev te kirdi. IV Halyqaralyq PROlogue kınofestıvali Ózbekstannyń jastar odaǵy jáne «Ózbekkıno» ulttyq agenttigi, Tashkent qalasy ákimdigi, Kınematorgrafııa damý ortalyǵy, Ózbekstannyń ulttyq kınokomıssııasynyń uıymdastyrýymen ótti.
Esterińizge sala ketsek, buǵan deıin «Asan» fılmi 9-shy Halyqaralyq Start film festival kınofestıvalinde de qazylar alqasynyń arnaıy júldesine ıe bolǵan edi.
