Asan Darbaev ulttyq ekonomıka vıtse-mınıstri bolyp taǵaıyndaldy
ASTANA. KAZINFORM — Asan Darbaev ulttyq ekonomıka vıtse-mınıstri bolyp taǵaıyndaldy. Bul týraly Úkimettiń baspasóz qyzmeti habarlady.
Asan Darbaev 1984 jyly Aqmola oblysynda dúnıege kelgen. Ál-Farabı atyndaǵy Qazaq ulttyq ýnıversıtetin, T. Rysqulov atyndaǵy Qazaq ekonomıka ýnıversıtetin, QR Prezıdenti janyndaǵy Memlekettik basqarý akademııasyn, Warwick ýnıversıtetin («Bolashaq» baǵdarlamasynyń stıpendıaty) támamdaǵan.
Eńbek jolyn 2005 jyly QR Qarjy mınıstrliginiń qurylymynda bastaǵan. Túrli jyldary «Básekeli saıasatty damytý jáne qorǵaý ortalyǵynda», Almaty oblysy boıynsha Monopolııaǵa qarsy basqarmada básekelestikti qorǵaý bóliminiń bas mamany, basshysy qyzmetterin atqarǵan.
2013-2014 jyldary QR Básekelestikti qorǵaý agenttiginde Kvazımemlekettik sektor jáne tutynýshylardyń quqyqtaryn qorǵaý departamenti dırektorynyń orynbasary, Memlekettik kásiporyndar men qosylýlaryn baqylaý departamentiniń dırektorynyń orynbasary boldy.
2014-2015 jyldary QR Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıtetiniń Memlekettik kásiporyndar men qosylýlaryn baqylaý basqarmasyn basqardy.
2015-2017 jyldary — QR UEM Tabıǵı monopolııalardy retteý jáne básekelestikti qorǵaý komıtetiniń tóraǵasynyń orynbasary. 2017 jyldan bastap qazirge deıin QR UEM Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti tóraǵasynyń orynbasary bolyp eńbek etti.
2019 jyldyń qyrkúıeginen bastap búgingi kúnge deıin Qazaqstan Respýblıkasy Ulttyq ekonomıka mınıstrligi Tabıǵı monopolııalardy retteý komıtetiniń tóraǵasy qyzmetin atqaryp keldi.
Buǵan deıin habarlanǵandaı, Qyzylorda oblystyq tabıǵı resýrstar basqarmasyna jańa basshy keldi.