Asamov qaza bolǵan stýdentti aman alyp qala almaǵany úshin keshirim surady
ALMATY. QazAqparat - QazUAÝ stýdenti Asamov qaza bolǵan Dıdar Bolysbekti aman alyp qala almaǵany úshin onyń ata-anasynan keshirim surady, dep habarlaıdy QazAqparat tilshisi sot zalynan.
«Bul dúnıede shyndyq joq ekendigine kózim jetti. Túrmede ótken 80 kúnim ókinishke toly boldy. Birge tamaqtanyp, birge júrgen balalardyń, ózim qutqaramyn degen sózine senbeýim kerek edi. Men ózbek bolsam da qazaq eliniń patrıotymyn. Qazaq elinde týdym. Dıdardyń ata-anasynan ony aman alyp qala almaǵanyma keshirim suraımyn. Biraq onyń ólimine qatysym joq. Ony bir Alla kórip tur», -dedi Toıshybek Asamov kózine jas ala otyryp.
Buǵan deıin protsessýaldy prokýror Tólegen Jaraspaev sottalýshyǵa QR QK 106-babynyń 3-bólimi boıynsha 9 jylǵa bas bostandyǵynan aıyrýdy surady.
Óz kezeginde qorǵaýshy Toıbek Joldasov tergeý jumystarynyń shala júrgizilgenin jəne sot medıtsınalyq saraptamanyń durys júrgizidmegendigin aıtyp qarsylyq bildirdi.
Onyń aıtýynsha, bul jerde Asamovtan bólek 7 bala otyrýy kerek.
Aıta keteıik, qaıǵyly oqıǵa 12 sáýirde QazUAÝ jataqhanasynda bolǵan edi. Birinshi jáne ekinshi kýrsta oqıtyn 10-nan astam stýdent jataqhanada tóbelesip, sonyń saldarynan 17 jastaǵy Dıdar Bolysbek qaza bolǵan edi.
Keıinirek polıtsııa atalǵan oqý ornynyń 2-kýrsynda oqıtyn 2 stýdentti ustady. Sot aldynda olardyń bireýi ǵana - Toıshybek Asamov jaýap berýde. Oǵan QR QK 106-babynyń 3-bóligi (adam densaýlyǵyna qasaqana aýyr nuqsan keltirý), QR QK 194-babynyń 1-bóligi (kúshtep múlkin tartyp alý) boıynsha aıyp taǵylyp otyr.
