Asaba adamnyń júregin jaralaıtyn ázilden aýlaq bolýy kerek
ASTANA. KAZINFORM — Toıda aıtylatyn ázil-qaljyń men júrgizýshiniń sózine toı ıesi aldyn ala talap qoıýy kerek. Bul týraly Nurlan Baıjigituly «BIZDIN ORTA» podkastynda aıtty.
Onyń sózinshe, toı ıesi asabamen aldyn ala sóılesip, qandaı taqyryptarǵa ázil aıtýǵa bolmaıtynyn naqty túsindirýi qajet.
— Sen asaba retinde qandaı qaljyńdar aıtasyń? Erteń qudalarymyz keledi. Bizde mynadaı jaǵdaılar bar. Ákesi joq adamnyń qasynda ákeni maqtama, balasy joq adamnyń qasynda balany kóterme, jary joq adamnyń qasynda áıeldiń ornyn aıt. Bul adamnyń júregin jaralamaý. Sondyqtan sózdi tańdap sóıleý kerek keıbir sózdiń adamǵa syrttaı aýyr tımegenimen, júreginde iz qaldyrýy múmkin, — dedi Nurlan Baıjigituly.
Nurlan Baıjigituly asabanyń ázilinde adamnyń jeke ómirine qatysty máselelerdi qozǵaýǵa erekshe mán berý kerektigin aıtty. Onyń pikirinshe, adamnyń ata-anasy, otbasy, bala-shaǵasy nemese basqa da jeke jaǵdaılary ázilge arqaý bolmaýy tıis.
Sonymen qatar ol keı jaǵdaıda qudalyq pen toı kezinde adamnyń ata-anasyna qatysty aýyr sózder aıtylatynyn da jetkizdi.
— Ákesi qaıtys bolǵan adamǵa «sen áke kórmegensiń, tárbıe kórmegensiń» dep tómendetip sóıleıtin jaǵdaılar jıi bolyp jatady. Men sonyń kýási boldym. Bir qudalyqta asaba sózinen keıin «meniń qudam joq, kimdi qushaqtaımyn» dep jylaǵan adamnyń da kýási boldym, — dedi ol.
Osyǵan baılanysty ol toı ıesi asabamen aldyn ala naqty kelisýi kerek dep sanaıdy.
— Asabamen naqty kelisip alý kerek. Sen qandaı qaljyńdar aıtasyń? Toıdy basqarasyń, biz saǵan úmit artyp otyrmyz. Biraq mynadaı sózderdi aıtpa, ersi qylyq kórsetpe dep aldyn ala aıtý qajet, — dedi Nurlan Baıjigituly.
Onyń pikirinshe, asaba tek kóńil kóterýmen shektelmeı, qazaqtyń salt-dástúri men mádenıetin tereń bilýi kerek.
— Nege sen sál de bolsa belden tómen ótetin ázilderge bara beresiń? Nege joǵaryraq, ulaǵatty, qazaqtyń bolmysyn kórsetetin ázilderdi aıtpaısyń? Qazaq tarıhynda ondaı ázilder óte kóp. Asaba kishkene oqýy kerek, talǵamy joǵary bolýy kerek, — dedi ol.
Nurlan Baıjigitulynyń aıtýynsha, toıdyń mazmuny men shekarasyn belgileýde sońǵy sóz toı ıesinde bolýy zańdy.
— Úıdiń ıesi sondaıdy talap etse asaba sizdiń yńǵaıyńyzǵa kónedi. Óıtkeni aqsha tólegen adamnyń sózi ótimdi. Sondyqtan ol toıdyń ıesine baılanysty dep esepteımin, — dedi ol.
Buǵan deıin qoǵamda toıshyldyqtyń mańyzy qandaı ekenin jazǵanbyz.
