Asa iri mólsherdegi alaıaqtyq jasady degen kúdikti Grýzııadan ekstradıtsııalandy
ASTANA. KAZINFORM – Bas prokýratýra men Іshki ister mınıstrligi Interpolynyń qyzmetkerleri Qazaqstannyń Grýzııadaǵy elshiliginiń qoldaýymen atalǵan elden asa iri mólsherde alaıaqtyq jasaǵany úshin qylmystyq jaýaptylyqqa tartý maqsatynda Qazaqstan azamatyn ekstradıtsııalady.
Tergeý barysynda atalǵan tulǵanyń 2023 jylǵy qarasha-jeltoqsan aılary aralyǵynda Almaty qalasynda kommertsııalyq jyljymaıtyn múlik obektisin satý syltaýymen aldaý jolymen jábirlenýshiden bir jarym mıllıon AQSh dollary mólsherindegi aqsha qarajatyn ıelenip alǵany anyqtaldy.
Qylmys jasaǵannan keıin kúdikti qylmystyq qýdalaý organdarynan jasyrynyp, osyǵan baılanysty halyqaralyq izdeýge jarııalanǵan.
Ótken jylǵy jeltoqsan aıynda ol Grýzııa aýmaǵynda ustalyp, Qazaqstan Respýblıkasy Bas prokýratýrasynyń suraý salýy boıynsha Qazaqstanǵa ekstradıtsııalandy.
Qazirgi ýaqytta kúdikti tergeý ızolıatoryna qamaýǵa alyndy.
Aıyptalǵan qylmysty jasaǵany úshin múlki tárkilenip, on jylǵa deıingi merzimge bas bostandyǵynan aıyrý jazasy kózdelgen.
Aıta ketelik anasyn pyshaqtaǵan kúdikti Vetnamnan ekstradıtsııalanǵan edi.
