Asa iri mólsherde alaıaqtyq jasaǵan kúdikti Reseıden ekstradıtsııalandy

ASTANA. KAZINFORM – Búgin Bas prokýratýra Qazaqstan Respýblıkasynyń Іshki ister mınıstrligimen birlesip, asa iri mólsherde alaıaqtyq jasaǵany úshin qylmystyq jaýapkershilikke tartý maqsatynda Reseı Federatsııasynan kúdiktini ekstradıtsııalady.  Bul týraly Bas prokýratýranyń baspasóz qyzmeti málimdedi.

«Ol 2020-2023 jyldar aralyǵynda qurylys kompanııasynyń basshysy bola otyryp, Astana qalasynda premıým sanatyndaǵy páterlerdi salý jáne satý syltaýymen aldyn ala sóz baılasý arqyly adamdar tobynda 4,3 mlrd teńgeden astam somaǵa 200-den astam úleskerdiń aqshalaı qarajatyn urlap ketken», — delingen habarlamada.

Qylmys jasaǵannan keıin kúdikti jasyrynyp, osyǵan baılanysty halyqaralyq izdestirý jarııalanǵan. 

«Ótken jyldyń qarasha aıynda Qazaqstan Respýblıkasy Bas prokýratýrasynyń suraý salýy boıynsha bul tulǵa Reseı Federatsııasynyń aýmaǵynda ustalyp, ony ekstradıtsııalaý týraly sheshim qabyldandy. Qazirgi ýaqytta ol tergeý ızolıatoryna qamaldy», — dep habarlady Bas prokýratýradan.

Qylmystyq toptyń basqa sybaılas qatysýshylary ótken jyldyń sońynda ustalyp, qazirdi tańda olarǵa qatysty tergeý amaldary júrgizilip jatyr.

Atalǵan qylmys jasaǵany úshin múlki tárkilenip, 5 jyldan 10 jylǵa deıingi merzimge bas bostandyǵynan aıyrý jazasy qarastyrylǵan.