Asa iri mólsherde alaıaqtyq jasaǵan kúdikti Reseıden elge jetkizildi

ASTANA. KAZINFORM — Taǵylǵan aıyp boıynsha oǵan múlkin tárkileı otyryp, 5 jyldan 10 jylǵa deıin bas bostandyǵynan aıyrý jazasy qarastyrylǵan, dep habarlaıdy Bas prokýratýra.

Qazaqstan Respýblıkasy Bas prokýratýrasynyń suraýy boıynsha Reseı Federatsııasynan asa iri mólsherde alaıaqtyq jasady degen kúdikpen qylmystyq jaýapkershilikke tartý úshin qazaqstandyq azamat ekstradıtsııalandy.

Atalǵan tulǵa 2017 jyly jalǵan fırma quryp, kontragentke bıtým jetkizý boıynsha jalǵan kommertsııalyq usynys jibergen.

Bıznes sýbektisinen 50 mln teńge alǵan ol qylmystyq jaýapkershilikten jaltarý maqsatynda jasyrynǵan, osyǵan baılanysty halyqaralyq izdeý jarııalanǵan.

— Ótken jyldyń qazan aıynda kúdikti Reseı Federatsııasynyń Orlov oblysynda ustalyp, keıin Qazaqstannyń Bas prokýratýrasynyń suranysy boıynsha otanyna ekstradıtsııalandy.
Taǵylǵan aıyp boıynsha oǵan múlkin tárkileı otyryp, bes jyldan on jylǵa deıin bas bostandyǵynan aıyrý jazasy qarastyrylǵan, — delingen habarlamada.

Osyǵan deıin 100 mln teńgeden astam qarjyny jymqyrdy degen kúdikti Germanııadan ekstradıtsııalanǵanyn habarlaǵan edik.