Asa iri kólemde alaıaqtyq jasaǵan kúdikti Ýkraınadan ekstradıtsııalandy
ASTANA. KAZINFORM - Búgin Bas prokýratýra men Interpol qyzmetkerleri Syrtqy ister mınıstrliginiń kómegimen Ýkraınadan asa iri kólemde alaıaqtyq jasaǵan kúdiktini ekstradıtsııalady.
Ol 2017-2019 jyldar aralyǵynda Almatyda salynyp jatqan úıden páter beremin degen syltaýmen azamattardyń jalpy somasy 140 mln teńgeden astam múlkin aldap alǵan.
Qylmys jasaǵannan keıin kúdikti qashyp ketkendikten oǵan halyqaralyq izdeý jarııalandy.
Ótken jyldyń qarasha aıynda kúdikti Ýkraına aýmaǵynda ustalǵan.
Qazaqstan Bas prokýratýrasynyń ótinishi boıynsha ýkraın tarapy kúdiktini elimizge ekstradıtsııalaý jóninde sheshim qabyldady.
Aıta keteri, byltyr Ýkraınanyń qylmyskerlerdi ekstradıtsııalaý máseleleri boıynsha Qazaqstan-Ýkraına ózara is-qımylyn rettegen Mınsk konventsııasynan shyqqanyna qaramastan atalǵan adamdy ustap berý Qazaqstan Respýblıkasy men Ýkraına arasyndaǵy 2018 jyly Qazaqstan Bas prokýratýrasy jasaǵan ekstradıtsııalaý týraly sharttyń arqasynda múmkin boldy.
Sonymen qatar, Astana men Kıev arasynda tikeleı áýe qatynasy bolmaǵandyqtan, izdeýde júrgen adamdy Ýkraınadan Moldova men Túrkııa arqyly ótkizýge týra keldi, ol úshin Bas prokýratýraǵa osy elderden adamdardy óz aýmaqtary boıynsha tranzıttik tasymaldaýǵa kelisimin alý qajet boldy.
Qazir ol Astana qalasyndaǵy tergeý ızolıatoryna qamaldy.
Aıyp taǵylyp otyrǵan qylmys jasaǵany úshin múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan.
