Asa iri kólemde alaıaqtyq jasaǵan qazaqstandyq Shvetsııadan elge jetkizildi

ASTANA. KAZINFORM — Bas prokýratýra men Interpol Ulttyq ortalyq bıýrosynyń qyzmetkerleri Syrtqy ister mınıstrliginiń kómegimen asa iri kólemde aqsha urlaǵany úshin qylmystyq jaýaptylyqqa tartý maqsatynda Qazaqstan azamatyn Shvetsııadan ekstradıtsııalady.

Kúdikti 2018 jyly ekinshi deńgeıdegi bankterdiń biriniń mobıldi qosymshasynda bolǵan júıelik qatelerdi paıdalanyp, bank kartasynyń aǵymdaǵy shotyndaǵy teńgerimnen asatyn somalarǵa oıdan shyǵarylǵan aýdarymdar jasaǵan.

Sonyń saldarynan bankke 55 mln teńge kóleminde shyǵyn keltirilgen.

Qylmys jasaǵannan keıin kúdikti jasyrynyp, oǵan halyqaralyq izdeý jarııalanǵan.

Osy jyly ol Shvetsııa Koroldiginiń aýmaǵynda ustalyp, Qazaqstan Bas prokýratýrasynyń suraýy boıynsha eline ekstradıtsııalandy.

Qazir kúdikti ýaqytsha ustaý ızolıatoryna qamaldy.

Aıyptalǵan qylmysty jasaǵany úshin múlki tárkilenip, bes jyldan on jylǵa deıingi merzimge bas bostandyǵynan aıyrý túrindegi jaza qarastyrylǵan.

Aıta keteıik, Shvetsııamen ekstradıtsııalaý týraly kelisim bolmasa da, 2023 jyldan beri bul elden Qazaqstanǵa 4 adam, onyń ishinde jalǵan aqsha jasaý jáne alaıaqtyq úshin ekstradıtsııalanǵan.

Eske salsaq júk kólikterin zańsyz tirkeýmen aınalysqan toptyń sybaılasy Reseıden ekstradıtsııalanǵan edi.