Asa iri kólemde alaıaqtyq jasady degen kúdikti Qyrǵyzstannan ekstradıtsııalandy
ASTANA. KAZINFORM — Qazaqstan Respýblıkasynyń Bas prokýratýrasy Qazaqstan azamatyn asa iri kólemde alaıaqtyq jasaǵany úshin qylmystyq jaýapkershilikke tartý maqsatynda Qyrǵyz Respýblıkasynan ekstradıtsııalady. Bul týraly vedomstvonyń baspasóz qyzmeti málim etti.
«Kúdikti 2023 jyly Almatyda jeldetýge arnalǵan bólshekter men kondıtsıonerlerdi jetkizemiz degen syltaýmen kásipkerdiń 75 mıllıon teńgeden astam qarjysyn jymqyrǵan. Qylmys jasaǵannan keıin alaıaq qashyp ketken, sol sebepti ol halyqaralyq izdeýge jarııalanǵan», — delingen habarlamada.
Aǵymdaǵy jyldyń mamyr aıynda ol Bishkek qalasynda ustalyp, odan keıin Qazaqstan Respýblıkasy Bas prokýratýrasynyń suraýy boıynsha otanyna ekstradıtsııalandy.
Qazirgi ýaqytta kúdikti Almaty qalasynyń ýaqytsha ustaý ızolıatoryna qamaldy. Aıyptalǵan qylmys úshin múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan.
