Asa qundy biregeı materıaldar alǵash ret ǵylymı aınalymǵa endi — Erlan Qarın
ASTANA. KAZINFORM — Alash qozǵalysynyń tarıhyna qatysty arhıv materıaldarynyń kópten kútken jınaǵy jaryq kórdi. Bul týraly Memlekettik keńesshi Erlan Qarın áleýmettik jelidegi paraqshasyna jazdy.
— Bul — «Alashorda isi. 1920-1940 jyldar. Qujattar men materıaldar» dep atalatyn 12 tomdyq arhıv qujattary. Jańa basylym — Saıası qýǵyn-súrgin qurbandaryn tolyq aqtaý jónindegi memlekettik komıssııanyń jumysy barysynda jınalǵan biregeı arhıv qujattarynan turatyn jınaq. Bul jınaqty daıyndaýǵa 30-dan astam tarıhshy, arhıvshi jáne arheograf atsalysty. Olardyń qatarynda QR Prezıdenti arhıviniń, Shoqan Ýálıhanov atyndaǵy tarıh jáne etnologııa ınstıtýtynyń, Abaı atyndaǵy Qazaq ulttyq pedagogıkalyq ýnıversıtetiniń qyzmetkerleri bar. Jobanyń ǵylym jetekshisi — QR UǴA akademıgi, tarıh ǵylymdarynyń doktory Mámbet Qoıgeldıev, — dep jazdy Memlekettik keńesshi.
Erlan Qarınniń aıtýynsha, basylymǵa partııalyq-memlekettik qurylymdarda jáne arnaýly memlekettik arhıvterde arnaıy saqtalǵan 3 myńnan astam materıal engen.
— Onyń ishinde Álıhan Bókeıhan, Ahmet Baıtursynuly, Mirjaqyp Dýlatov, Halel Dosmuhamedov jáne basqa da qaıratkerler ómiriniń buryn beımálim tustarynan syr shertetin qujattar bar. 2 myń danamen jaryq kórgen jınaq elimizdiń oqý oryndary men ǵylymı mekemelerine taratylady. Osylaısha, Qazaqstan tarıhyn odan ári zerdeleý jáne eldiń tarıhı jadyn saqtap, nyǵaıtý turǵysynan óte mańyzdy jáne asa qundy biregeı materıaldar alǵash ret ǵylymı aınalymǵa engizildi. Jalpy, 2020-2023 jyldary jumys istegen Memlekettik komıssııanyń qyzmetine 425 ǵalym, onyń ishinde aımaqtardan kelgen 260 zertteýshi jumyldyryldy. Úsh jyldyń ishinde 60 memlekettik jáne vedomstvolyq arhıvten 700 myńǵa jýyq is jınaldy, 2.6 mıllıonǵa jýyq materıal men qujattyń qupııalyǵy alynyp tastaldy, saıası-qýǵyn súrginniń qurbany bolǵan 311 myńnan astam adam aqtaldy, — dep habarlady Erlan Qarın.
Eske sala ketý kerek, buǵan deıin Erlan Qarın Memleket Jazýshylar odaǵynyń jumysyna erekshe mán beretinin aıtqan bolatyn.