Asa kórnekti memleket qaıratkeri Fazyl Káribjanovtyń 100 jyldyǵyna arnalǵan eske alý keshi ótti
ASTANA. 31 mamyr. QazAqparat - «Nazarbaev Ortalyǵy» kópfýnktsıonaldy ǵylymı-taldaý jáne gýmanıtarlyq-aǵartý memlekettik mekemesiniń kontserttik zalynda asa kórnekti qoǵam qaıratkeri Fazyl Kárimuly Káribjanovtyń 100 jyldyǵyna arnalǵan eske alý keshi ótti.
Fazyl Káribjanov - Qazaqstan Kompartııasy Ortalyq komıtetiniń aýylsharýashylyq bólimi meńgerýshisi, Qaraǵandy oblystyq partııa komıtetiniń ekinshi hatshysy, Qazaq KSR-i Joǵarǵy Keńesi tóralqasynyń tóraǵasy bolyp qyzmet etti. Óz eńbek jolyn F. Káribjanov qatardaǵy agronom qyzmetinen bastap kórnekti memleket qaıratkeri deńgeıine kóterildi.
Eske alý keshine Fazyl Káribjanovtyń týǵan jáne jaqyn týystary, zııaly qaýym, memleket jáne qoǵam qaıratkerleri qatysty.
Fazyl Káribjanov nebary 48 jas ómir súrdi. Osy qysqa ǵumyryndaǵy onyń elimizdiń ekonomıkalyq damýyna qosqan úlesi zor. Soǵys jyldaryndaǵy úzdik qyzmeti úshin ol eki ret «Qurmet belgisi» ordenimen marapattaldy. Onyń talmas eńbeginiń nátıjesinde elimizdiń egis alqabynyń kólemi 30 mln. gektarǵa jetti. Osy jetistikteri úshin F. Káribjanov Lenın ordenimen marapattaldy.
Eske alý keshin uıymdastyrýshy - QR Mádenıet jáne aqparat mınıstrliginiń Mádenıet komıteti. Kontsertte QR halyq ártisi Qaırat Baıbosynov, QR eńbek sińirgen ártisi Ǵalııa Baıǵazınova, Qazaqstannyń eńbek sińirgen qaıratkerleri Azamat Jyltyrkózov, Bıbigúl Januzaq, Gúlmıra Sarına, Gúlzıra Bókeıhan, Janat Shybyqbaev, «Aq jaýyn» memlekettik kameralyq orkestri jáne «Naz» memlekettik bı teatry óner kórsetti.
