Asa qaýipti ınfektsııalar ulttyq ǵylymı ortalyǵynyń zerthanasy halyqaralyq sertıfıkatqa ıe boldy
Búginnen bastap AQIUǴO Ortalyq referens-zerthanasy Orta Azııadaǵy nómiri birinshi zerthana bolyp esepteledi.
Sonymen qatar, zerthanalyq bıologııalyq táýekelderdi basqarýdyń jańa halyqaralyq standarty boıynsha akkredıtatsııadan ótken, kez kelgen táýekeldi baqylaý jáne azaıtý maqsatynda qaýipti bıologııalyq agenttermen jáne materıaldarmen jumys isteıtin zerthanalarǵa qoıylatyn talaptar men usynymdardy aıqyndaıtyn álemdegi alǵashqy zerthanalardyń biri.
ISO 35001 sertıfıkaty boıynsha akkredıtatsııaǵa usynylǵan úsh mınıstrliktiń (DSM, BǴM, AShM) bıologııalyq jáne ózge de táýekelderdi basqarý salasyndaǵy ORZ qyzmetkerleri ózderiniń joǵary kásibı biliktiligin kórsetti, ıaǵnı bul júrgiziletin zertteýlerdiń halyqaralyq deńgeıde qaýipsiz ekenin bildiredi.
Aıta ketý kerek, ORZ alǵashqylardyń biri bolyp standartta sıpattalǵan bıologııalyq táýekelderdi baqylaýdyń jańa júıesin zertteýge jáne engizýge kiristi.
COVID-19 indetine baılanysty qalyptasqan qıyn jaǵdaıǵa qaramastan, júrgizilgen zertteýler sapasyn saqtap qana qoımaı, onyń deńgeıin joǵarylatqan áriptesterimizdi quttyqtaımyz, bul halyqaralyq deńgeıdegi moıyndaý dep bilemiz.
ORZ halyqaralyq standart boıynsha akkredıtatsııadan ótýi óńirlik jáne jahandyq bıologııalyq qaýipsizdikti arttyrýǵa yqpal etedi.
Aıta keteıik, bul ortalyqóz jumysyn 1949 jyly obaǵa qarsy Orta Azııa ǵylymı-zertteý ınstıtýty qurylǵanda bastaǵan. 1992 jyldyń qańtarynda QR DSM Qazaq obaǵa qarsy ǵylymı-zertteý ınstıtýty bolyp ózgertildi. 2001 jyly M. Aıqymbaev atyndaǵy Qazaq karantın jáne zoonozdyq ınfektsııalar ǵylymı ortalyǵy bolyp qaıta quryldy.
2019 jylǵy shildede QR Úkimetiniń qaýlysymen M. Aıqymbaev atyndaǵy asa qaýipti ınfektsııalar ulttyq ǵylymı ortalyǵy dep atala bastady.
Onyń quramyna obaǵa qarsy 9 óńirlik fılıal kiredi. AQIUǴO jáne onyń fılıaldarynyń mıssııasy - elimizde bıologııalyq qaýipsizdikti qamtamasyz etý, adamdar men janýarlar arasyndaǵy aýrýlardyń aldyn alý jáne azaıtý úshin Qazaqstan aýmaǵynda azamattardyń asa qaýipti ınfektsııalardy juqtyrý qaýipine monıtorıng jasaý, aldyn alý, baǵalaýdyń ǵylymı negizderin ázirleý jáne engizý.
