Asa iri kólemde para alýǵa oqtalǵan BQO memlekettik kirister departamenti qyzmetkeri 11 jylǵa sottaldy

ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda BQO memlekettik kirister departamentiniń burynǵy bas mamany Raýan Jeksenǵalıevke qatysty úkim shyqty, dep habarlaıdy QazAqparat tilshisi.

Atalǵan sottyń baspasóz qyzmetinen málim etkenindeı, R.Jeksenǵalıev QR QK 24-baby 3-bóligi, 366-baby 4-bóligine sáıkes (asa iri kólemde para alýǵa oqtalý) aıypty dep tanylyp, 11 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.

Ol sondaı-aq memlekettik qyzmette, jergilikti basqarý jáne basqa organdarda laýazymdardy atqarý quqyǵynan ómir boıyna aıyryldy.

Sot talqysynda belgili bolǵanyndaı, R.Jeksenǵalıev BQO memlekettik kirister departamentiniń bas mamany qyzmetin atqara júrip, bıylǵy 20 mamyrda jospardan tys salyqtyq tekserý nátıjesinde bıýdjetke salyq tóleýden jaltarý deregi boıynsha materıaldy departamentke jibermeý úshin «Torgovyı dom «UNEX (ıÝNEKS)» JShS dırektory K.Jamanǵarınnen asa iri kólemde – 40 mln teńge para alǵan. Ol qylmystyq is-áreketin ózine baılanysty emes mán-jaılar boıynsha aıaǵyna deıin jetkize almaǵan.

Sottalýshy óz kinásin ishinara moıyndap, 4 mln teńgeni aldaý jolymen almaq bolǵanyn túsindirdi. Soǵan qaramastan, R.Jeksenǵalıevtiń aıyby tolyqtaı dálelin tapty.

Sot úkimi zańdy kúshine engen joq.

Eske sala keteıik, budan buryn 134 mln teńge para alǵan Oral qalasynyń bas qurylysshysyna sot bastalǵanyn jazǵan bolatynbyz.