Asa iri kólemde para alǵan Oral qalasy qurylys bóliminiń basshysy 11 jylǵa sottaldy

ORAL. QazAqparat – BQO qylmystyq ister jónindegi mamandandyrylǵan aýdanaralyq sotynda Oral qalasy qurylys bóliminiń burynǵy basshysy Arman Óksikbaevqa qatysty úkim shyqty, dep habarlaıdy QazAqparat tilshisi.

Atalmysh sottyń baspasóz qyzmetinen málim etkenindeı, A.Óksikbaev QK 24-baby 3-bóligi, 366-baby 4-bóligine sáıkes aıypty dep tanylyp, 11 jylǵa bas bostandyǵynan, sondaı-aq memlekettik qyzmette laýazymdar atqarý quqyǵynan ómir boıyna aıyryldy.

Sondaı-aq onyń sybaılasy, «Syrlasý» JShS júrgizýshisi Aleksandr Naǵmetov QK 24-baby 3-bóligi, 28-baby 5-bóligi – 366-baby 4-bóligine sáıkes 8 jylǵa sottaldy.

Sottalýshylar jazasyn qaýipsizdigi barynsha joǵary qylmystyq-atqarý júıesi mekemesinde óteıtin bolady.

Sot talqysynda málim bolǵanyndaı, A.Óksikbaev Oral qalasy qurylys bóliminiń basshysy qyzmetin atqara júrip, deldal A.Naǵmetov arqyly 2020 jyldyń qazanynan 2021 jyldyń 11 qazanyna deıin JShS dırektory Sh-dan aldyn ala kelisilgen 170 mln teńgeniń 134 mln teńgesin alǵan. Bul para qosalqy merdiger «B» JShS-nyń jumys kólemin alyp, jalpy quny 2 mlrd teńgeden asatyn eki toǵyz qabatty úı qurylysy boıynsha oryndalǵan jumystardyń aktilerine A.Óksikbaevtyń kedergisiz qol qoıǵany úshin berilgen.

Sottalýshylar ózderine qatysty emes mán-jaılar boıynsha qylmystyq is-áreketterin aıaǵyna deıin jetkize almaǵan.

A.Óksikbaev kinásin moıyndaǵan joq.

Sottalýshylardyń kinási kýágerlerdiń aıǵaqtarymen, áńgimeleriniń stenogrammalarymen, tintý hattamalarymen, oqıǵa ornyn qaraýmen, sot saraptamalary qorytyndylarymen tolyqtaı dáleldendi.

Sot úkimi kúshine engen joq.

Eske sala keteıik, budan buryn 134 mln teńge para alǵan Oral qalasynyń bas qurylysshysyna qatysty sot bastalǵanyn jazǵan bolatynbyz.