Asa aýyr qylmys jasaǵan qostanaılyqtarǵa qatysty úkim shyqty
QOSTANAI. QazAqparat - Qostanaı oblysynda asa aýyr qylmys jasaǵan aǵaıyndylarǵa qatysty sot úkimi shyqty, dep habarlaıdy QazAqparat tilshisi.
Búgin Qostanaı oblysynyń qylmystyq isteri boıynsha mamandandyrylǵan aýdanaralyq soty 29 jastaǵy Nıkolaı Lapshın men 35 jastaǵy Svetlana Lapshınaǵa qatysty úkim shyǵardy. Olar QR QK 99-baby 2-bóligi, 5, 7 tarmaqtaryna (asa qatygezdikpen adam óltirý) sáıkes aıyptalýda.
Іs materıaldary boıynsha, 2006 jyldan bastap S.Lapshına A.Zarkovpen birge azamattyq nekede turǵan. Olardyń eki balasy bar. Ekeýi birge turǵan ýaqytta Zarkov Lapshınany birneshe ret uryp-soqqan. Jábir kórgen Lapshına bul jaǵdaıdy óziniń inisine aıtady.
Aǵymdaǵy jyldyń 9 sáýirinde saǵat 16:00-der shamasynda olardyń úıine N.Lapshın qonaqqa keledi. Saǵat 23.00-de shamasynda Zarkov mas kúıinde kelip, Lapshınaǵa til tıgizedi. Aralarynda janjal týyndap, arty tóbeleske ulasqan. Іnisi apasynyń jaǵyna shyǵyp, aǵaıyndylar Zarkovqa birneshe soqqy jumsaıdy. Sodan keıin Zarkov edende jatyp qalady.
Lapshın apasyna kisi óltirý áreketine barýdy usyndy. Al Lapshına buǵan kelisip, jábirlenýshiniń bas jáne moıyn tusyna 70 ret pyshaq suqqan. Lapshın tiri jatqan Zarkovtyń basyn balǵamen urady. Ol sol jerde qaza tapqan.
11 sáýirde saǵat 01-00-der shamasynda N.Lapshın jıenimen birigip, A.Zarkovtyń denesin mataǵa orap qıraǵan ǵımaratqa aparyp tastaıdy.
Sot úkimimen ekeýi de kináli dep tanyldy. Sot N.Lapshındi 17 jylǵa, al S.Lapshınany 15 jylǵa bas bostandyǵynan aıyrý týraly úkim shyǵardy.
Úkim zańdy kúshine engen joq.
