Asa aýyr qylmys jasaǵany úshin kúdikti Ázerbaıjannan ekstradıtsııalandy

ASTANA. KAZINFORM — Qazaqstan Respýblıkasynyń Bas prokýratýrasy men Іshki ister mınıstrliginiń qyzmetkerleri Qazaqstannyń Ázerbaıjandaǵy Elshiliginiń kómegimen asa aýyr qylmystar, onyń ishinde adam óltirý men qaraqshylyq jasaǵany úshin izdeýde júrgen Qazaqstan azamatyn Ázerbaıjan Respýblıkasynan ekstradıtsııalady. 

— Ótken jyldyń qazanynda kúdikti basqa adammen top bolyp, tanys kásipkerdi kezdesýge aldap shyǵaryp, ony esinen tanǵansha uryp-soǵyp, jalpy quny 40 mln teńgege jýyq múlkin ıemdenip, keıin Almaty qalasynyń syrtyna alyp shyǵyp, óltirgen, — delingen habarlamada.

Kúdiktilerdiń biri izin sýytpaı ustalyp, al ekinshisi jasyrynyp, oǵan halyqaralyq izdeý jarııalandy.

Aǵymdaǵy jyldyń qańtarynda ol Ázerbaıjan aýmaǵynda ustalyp, Qazaqstan Bas prokýratýrasynyń suraýy boıynsha otanyna ekstradıtsııalandy.

Qazirgi ýaqytta ol tergeý ızolıatoryna qamaldy.

Aıyptalǵan qylmystardy jasaǵany úshin múlkin tárkilep, 20 jylǵa deıingi merzimge bas bostandyǵynan aıyrý nemese ómir boıyna bas bostandyǵynan aıyrý túrindegi jazalar kózdelgen.

Buǵan deıin habarlanǵandaı, Astanada 49 adam 82 mln teńgesinen aıyrylyp, san soǵyp qalǵan edi.