As ázirleıtin, baqsha egetin temirler: Astanada robototehnıkadan chempıonat ótti
ASTANA. QazAqparat - Astanada robototehnıkadan respýblıkalyq chempıonat ótti. World Robot Olympiad atalǵan chempıonatta jas ónertapqyshtar «Astyń mańyzy» taqyrybynda zamanaýı ıdeıalaryn ortaǵa saldy, dep habarlaıdy QazAqparat tilshisi.
Jas robototehnıkterdiń jarysy erekshe kreatıvti bastaldy. Ashylý saltanatynda dástúrli qyzyl lentany eki dron tóbeden ushyryp ákeldi.
Jarys tórt sanattan turdy: «bazalyq», «kreatıvti», «robottar fýtboly» jáne «Smart city».
«WRO 2018» taqyryby «Astyń mańyzy» dep ataldy. Sondyqtan jobalardyń basym bóligi taǵamdarmen baılanysty boldy. Organıkalyq sý kapsýlalaryn jasaıtyn robot, taǵamǵa arnalǵan 3D prınterler, jarma botqasyn daıyndaıtyn robot, aqyldy azyq-túlik dúkenderi, robottyq sańyraýqulaq fermasy, robot baǵbandar t.b.
Odan bólek, ashtyqqa qarsy jahandyq kúreske arnalǵan birqatar qyzyqty jobalar usynyldy. Sondaı erekshe jumystardyń biri Taldyqorǵan qalasynan kelgen jas ónertapqyshtar Danııl Fılımonov pen Abdyrasýl Rasýlovtyń «Space garden» nemese «ǵaryshtaǵy jylyjaı» roboty boldy.
Qurylǵy arqyly uzaq ǵaryshtyq ekspedıtsııalarǵa arnalǵan keńistikte ósimdikterdi avtomatty ósirýge bolady. Robot stantsııada ushyp júrip egin egýmen, ony kútip baptaýmen jáne azyqty jınap alýmen aınalysady.
«Jarysqa qatysqan árbir jas ónertapqyshtyń eńbegi aıtýǵa turarlyq jáne bir-birin qaıtalamaıdy. Barlyq jeńimpazdar jattyǵý kezdesýlerine qatysady jáne sonyń negizinde Taılandta ótetin Dúnıejúzilik robottar olımpıadasynda el namysyn qorǵaıtyn ulttyq komanda qurylady», - dedi «Nazarbaev Zııatkerlik mektepteri» DBBU tóraıymy Kúlásh Shámshıdınova. 
