Arzandatylǵan janarmaı bólý qyzmeti pılottyq rejımde iske qosyldy
ASTANA. QazAqparat - Gosagro.kz júıesinde arzandatylǵan otyndy bólý fýnktsıonaly paıda boldy. Ol Sýbsıdııalaýdyń biryńǵaı memlekettik aqparattyq júıesiniń (SBMAJ) basqa memlekettik organdardyń aqparattyq bazalarymen ıntegratsııalanýynyń arqasynda júzege asyryldy, dep habarlaıdy QR AShM baspasóz qyzmeti.
Búgingi kúni pılottyq rejımde Qostanaı jáne Jambyl oblystarynyń fermerleri JJM-ge ótinimder berip jatyr. Qyzmetti odan ári paıdalaný kezinde qatelikterdi boldyrmaý úshin rejım ázirshe synaqtan ótkizilip jatyr.
SBMAJ-daǵy avtomattandyrylǵan protsess «Qazaqstan Ǵarysh Sapary» UK» AQ derekteri negizinde alqaptar kartasyn qalyptastyrýǵa múmkindik beredi. Óńdeletin jerlerdiń aýdany ǵaryshtyq sýretter arqyly avtomatty túrde belgilenedi jáne fermer úshin agropak.kz portalynda kórsetiledi. Memlekettik sýbsıdııalaý júıesimen ıntegratsııa, sondaı-aq qarsy mindettemelerdi engizý úshin de jumys isteıdi. Esterińizge sala keteıik, 2023 jyldyń 31 jeltoqsanyna deıin alqaptardyń kartasyn tsıfrlandyrý boıynsha talaptar joıyldy. Osy ýaqytqa deıin fermerler osy egistikterdi quqyq belgileıtin qujattarǵa sáıkes mindetti túrde túzetýi kerek.
Sondaı-aq, Gosagro.kz júıesinde sýbsıdııalarǵa berilgen elektrondyq shot-faktýralardy «buǵattaý» fýnktsıonaly iske qosyldy. Buryn jeke júıede mundaı mehanızm bolmaǵan, bul EShF-ny qaıtaryp alýǵa jáne ártúrli manıpýlıatsııalarǵa múmkindik týǵyzdy. Bir sýbekt EShF-ny keri qaıtaryp alý arqyly jeke júıede birneshe ret sýbsıdııalanǵan faktiler bar. SBMAJ-da mundaı múmkindik tolyǵymen alynyp tastalady, ıaǵnı fermerlerdi memlekettik qoldaýǵa baǵyttalǵan bıýdjet qarajaty tıimdi jáne maqsatyna saı paıdalanylady.
Máselen, ótinimderdi qabyldaý ashylǵan sátten bastap júıede sýbsıdııalaý qaǵıdalaryna sáıkes búkil el boıynsha fermerler 28 447 ótinim berdi, 20 767 paıdalanýshy tirkeldi. «Kútý paraǵyna» sáıkes, 57,7 mlrd teńgege ótinimder maquldandy (tólendi).
Paıyzdyq mólsherlemeni sýbsıdııalaý boıynsha júıede 355 qarjy ınstıtýty (AKK, KAF, EDB, kredıttik seriktestikter) tirkeldi. Olar Aýyl sharýashylyǵy basqarmalaryna 2 891 ótinim berip, 16,3 mlrd teńge sýbsıdııa tólendi, taǵy 22,4 mlrd teńgege ótinim maquldanyp, tólemdi kútip otyr.
Osylaısha, gosagro.kz jańa júıesi arqyly 96,5 mlrd teńge somasyna ótinimder óńdelip, maquldandy jáne ishinara tólendi.
