Arzan Toyota Land Cruiser izdegen shyǵysqazaqstandyqtar alaıaqtarǵa jem boldy
ÓSKEMEN. QazAqparat - Shyǵys Qazaqstanda 520 adam ınternet-alaıaqtardyń qurbanyna aınalǵan, dep habarlaıdy QazAqparat tilshisi.
Tirkelgen 520 alaıaqtyq oqıǵanyń 407-sinde alaıaqtar oblys aýmaǵynan tys jerde otyryp-aq áreket etken.
Mysaly, Qaraǵandy oblysynyń Abaı qalasynda turatyn azamat Shyǵys Qazaqstannyń eki turǵynyna IPhone markaly telefon «satqan». Ańqaý turǵyndar jalǵan habarlandyrýǵa senip, anonımdi tóleý júıesine aqshanyń bir bóligin aýdaryp jibergen.
Al temirtaýlyq 46 jastaǵy alaıaq ShQO-nyń alty birdeı turǵynyn aldap soqqan. Ol óz qurbandaryna qońyraý shalyp, olardyń uıaly telefon utyp alǵany týraly jalǵan aqparat bergen.
«Utys týraly tolyǵyraq bilgińiz kelse, osy nómirge aqsha salyńyz» degen shart qoıylyp otyrǵan. Bul qýlyqqa alty birdeı adam aldanypty.
Ǵalamtordan arzan avtobólshekter men kólik izdeýshiler de jıi aldanatyn bolypty. Oblystyq Polıtsııa departmentiniń málimetine sensek, «Toyota Land Cruiser» kóligin qoljetimdi baǵaǵa satyp almaq bolǵan 12 adam jer sıpap qalǵan.
«Taǵy 10 azamat 41 jastaǵy alaıaqqa avtobólshekter úshin aldyn ala aqsha aýdaryp jibergen. Barlyq jaǵdaıda usynylǵan taýardyń quny bazar baǵasynan áldeqaıda arzan bolýy zardap shegýshilerdi qatelikke uryndyrǵan» - deıdi departament ókili Aıgerim Nurǵazına.
Onyń aıtýynsha, jalǵa páter berý, plastık tereze ornatý, nesıe resimdeý, kýrstyq jáne dıplomdyq jumystardy jazý týraly habarlamalardyń arasynda da alaıaqtyq jarnamalar kóbeıip ketken.
