Arzan tehnıka alyp beremiz dep zeınetkerdi aldaǵandar ustaldy
ALMATY. QazAqparat - Almatyda alaıaqtar «turmystyq tehnıkaǵa jeńildik júrip jatyr» degen jeleýmen zeınetkerdiń 100 myń teńgesin qoldy etken, dep habarlaıdy QazAqparat agenttiginiń tilshisi.
Áýezov aýdandyq polıtsııasynyń qyzmetkerleri 40 jastaǵy áıel men 45 jastaǵy er adamdy ustady. Qazir olar óz qylmystaryn moıyndap otyr.
«Ońasha otyrǵan zeınetker áıelge er adam jaqyn kelip jarnamalyq broshıýralar kórsetip, turmystyq tehnıkaǵa keremet jeńildikter bolyp jatqanyn aıtqan. Zeınetker broshıýradaǵy usaq áriptermen jazylǵan jazýdy oqyp ta úlgermegen. Osy sátte olardyń qasyna 40 jastaǵy áıel kelip, taǵy da qosymsha jýrnaldardy kórsetip, 200 myń teńge turatyn tońazytqyshty sý tegin alyp ketýge bolady dep sendirgen. Biraz ýaqyttan soń orta jastaǵy taǵy bir áıel kelip, syrttan kelgen bóten adam keıpinde aktsııa týraly surastyra bastaıdy. Erekshe «qyzyǵýshylyq» tanytqan áıel barlyq shartqa kelise bastaıdy. Muny kórgen zeınetker de aıtylǵan usynystardy qoldaıdy. Barlyǵy dúkenge bet alǵan kezde alaıaqtar zeınetkerge aqsha kerek ekendigin aıtqan. Qart áıel úıinen 100 myń teńge alyp bergen. Aqshany alǵandar jeńildikke qujat rettestiremiz dep taıyp turǵan», - dedi Áýezov aýdandyq ІІB basshysy Esen Ysqaqov.
Onyń aıtýynsha, atalǵan derek boıynsha QR QK-niń 190-babymen sotqa deıingi tergeý jumystary bastaldy. Zeınetkerdi kóndirip berýge kómektesken áıel de izdestirilip jatyr.
«Olardyń áreketinen zardap shekken azamattar bolsa, 8-747-718-84-30; 298-53-02; 298-53-62 nemese 102 telefondaryna habarlasýlaryn suraımyz», - dedi Áýezov aýdandyq ІІB basshysy, polıtsııa polkovnıgi Esen Ysqaqov.
