Arzan taýarǵa qyzyqqan aqtóbelikter ınternettegi jarnamalarǵa aldanyp qaldy

AQTÓBE. QazAqparat - Aqtóbe oblystyq ishki ister departamenti ınternet arqyly tapsyrys berip, aldanyp qalǵan adamdardyń shyǵynyn tolyq esepteı almaı jatyr. Kóliktiń qosalqy bólshekterin, qundyz tondy arzan baǵaǵa satyp alamyn dep aldanǵandar sany kún ótken saıyn artyp keledi, dep habarlaıdy QazAqparat tilshisi.

Aqtóbe oblystyq ІІD alaıaqtarǵa aldanǵan aqtóbelikterdi mysalǵa keltirip, ınternet arqyly tapsyrys bergen kezde nemese taýar satyp alǵanda abaı bolýǵa shaqyrdy. Taýar baǵasyn arzandatyp nemese tıimdi bıznes usynyp jatqandar Reseıde otyryp, aqtóbelikterdi tonap jatyr.

«Ekinshi deńgeli bank arqyly aqsha aýdarylǵan soń satýshylar baılanysty úzip, iz-túzsiz ketedi. Al aqtóbelikter taýaryn tosyp júr. Olar júzdegen myń teńgesin joǵaltty. Sonymen qatar, ınvestor bolyp, paıda tabýdy usynǵandarǵa da aldanǵandar bar. Shetel valıýtasymen aqsha aýdarýdy surap, keıin joǵalyp ketken. Aqsha Reseıge aýdaryldy. Máselen, eki aqtóbelik ınvestor bolyp, baıý úshin 11 myń dollar aqshasyn aýdanyp jiberdi. Satý-satyp alý kezinde abaı bolý qajet ekenin eskertemiz. Aldyn ala aqsha aýdarýǵa bolmaıdy»,- dep habarlady oblystyq ІІD baspasóz qyzmeti.

Beıtanys adamǵa bank esepshotynyń nómirin berýge bolmaıdy. Aqsha aýdaryp, aldanyp qalǵanyn sezgen adam birden ishki ister organdaryna habar berýi tıis.

«Taıaýda 54 jastaǵy aqtóbelik aldanyp qaldy. Belgisiz adam «avtobýs satyp alyp beremin» dep aqtóbeliktiń esepshotyndaǵy 8,1 myń dollaryn alyp ketken. Qazirgi ýaqytta alaıaqtyq jasaǵandardyń isi tergelip jatyr»,- dedi oblystyq ІІD baspasóz qyzmeti.