Arzan páter alyp beremiz: Qosshyda qos zeınetkerdi aldaǵan áıelderge is qozǵaldy
ASTANA. KAZINFORM - Aqmola oblysynda Astanadan arzan baǵaǵa páter alyp beremiz dep ýáde etken kúdiktilerge qatysty tergeý bastaldy. Alaıaqtyq áreketten eki zeınetker zardap shekken, dep habarlaıdy Kazinform tilshisi.
Aqmola oblystyq polıtsııa departamentiniń málimetinshe, Qosshy qalasynyń polıtsııa bólimine eki jergilikti turǵyn aryzdanǵan. Olardyń aıtýynsha, syrttaı ǵana tanıtyn áıelder Astanadan tómen baǵamen úsh bólmeli páter alyp beremiz dep sendirgen.
– Kúdiktiler japa shegýshilerge páterlerge tyıym salynǵanyn, sol sebepti bir jyldan keıin ǵana rásimdeletinin aıtqan. Sonymen qatar aqshany tek qolma-qol berý qajet ekenin eskertken, - dep habarlady polıtsııa ókilderi.
Budan bólek, kúdiktiler páter máselesi boıynsha telefonmen habarlaspaýǵa jáne hat jazbaýǵa keńes bergen. Olar muny «telefondar men jazbalar tekseriledi» dep túsindirip, barlyq máseleni tek jeke kezdesýde talqylaýdy talap etken.
Alaıda arada eki jyl ótse de, zeınetkerler ýáde etilgen baspanalaryn ala almaǵan.
– Qazirgi ýaqytta polıtsııa «Alaıaqtyq» baby boıynsha sotqa deıingi tergeý júrgizip jatyr. Jedel izdestirý sharalary barysynda iske qatysy bolýy múmkin Astana qalasynyń eki turǵyny anyqtaldy, - dep habarlady Polıtsııa departamentinen.
Polıtsııa qyzmeti azamattardy kúmándi usynystarǵa senbeýge shaqyrdy. Ásirese naryqtaǵy baǵadan áldeqaıda arzan jyljymaıtyn múlik usynylsa, onyń zańdy qujattaryn muqııat tekserý qajet ekenin eskertti. Sondaı-aq mámilelerdi tek resmı túrde rásimdeý kerektigi aıtyldy.
Aıta keteıik, buǵan deıin turǵyn úı naryǵynyń jaı-kúıi jáne páter baǵasy jaıynda jazǵanbyz.
