Arzan qysqy dóńgelek izdegender alaıaqtardyń quryǵyna túsýi múmkin – ІІM
ASTANA. KAZINFORM – Qazaqstanda kúnniń sýytýyna baılanysty qysqy dóńgelekterge suranys artqan. Osyny paıdalanǵan alaıaqtar ınternette arzan shına satamyz degen jeleýmen turǵyndardyń aqshasyn aldap alýǵa tyrysyp jatyr, dep habarlaıdy Polisia.kz.
Іshki ister mınıstrliginiń málimetinshe, alaıaqtar ınternet-platformalarda, áleýmettik jeliler men messendjerlerde qysqy dóńgelekterdi naryqtaǵy baǵadan arzanǵa usynatyn habarlandyrýlar jarııalaıdy.
Ózderin satýshy retinde tanystyrǵan qaskóıler taýardy brondaý úshin aldyn ala tólem jasaýdy nemese tolyq qunyn aýdarýdy talap etedi. Olar suranystyń joǵary ekenin, dóńgelekter sany shekteýli ekenin aıtyp, satyp alýshyny asyqtyrady.
Aqshany alǵannan keıin baılanysqa shyqpaı, satyp alýshyny buǵattap, habarlandyrýdy óshirip tastaıdy. Saldarynan azamattar aqshasynan da, taýardan da aıyrylady.
– Esińizde bolsyn: tómen baǵa men tez aldyn ala tólem jasaýdy talap etý ınternet-alaıaqtyqtyń belgileri bolýy múmkin. Eger alaıaqtyq áreketke tap bolsańyz, dereý polıtsııaǵa 102 nómiri arqyly habarlasyńyz, – dep eskertti ІІM ókilderi.
Mınıstrlik azamattarǵa beıtanys satýshylarǵa taýardy almaı turyp aqsha aýdarmaýǵa, tym arzan usynystarǵa senbeýge keńes beredi.
Sondaı-aq qysqy dóńgelekterdi resmı dúkender men senimdi saýda oryndarynan satyp alyp, tólem jasamas buryn olardyń bar-joǵyn jáne jaı-kúıin jeke teksergen jón.
Polıtsııa kúmándi siltemelerge ótpeýdi, bank kartasynyń derekteri men SMS-kodtardy bógde adamdarǵa bermeýdi eskertti.
Aıta keteıik, buǵan deıin polıtsııa ınternette taýarlardy arzan baǵamen usynyp, aldyn ala tólem alǵannan keıin baılanysqa shyqpaı qoıatyn alaıaqtar týraly eskertken bolatyn.
