Arzan ıpoteka rásimdeımin: Pavlodarda jurtty 80 mln teńgege aldaǵan jigit sottaldy
PAVLODAR. KAZINFORM — Pavlodarda 26 jastaǵy er azamat iri mólsherdegi alaıaqtyq jasaǵany úshin kináli dep tanylyp, úsh jylǵa bas bostandyǵynan aıyryldy.
Tergeý málimetterine súıensek, ol 2025 jylǵy qyrkúıekten 2026 jylǵy aqpanǵa deıin jergilikti turǵyndardy aldap kelgen. Ol ózine tıesili jaýapkershiligi shekteýli seriktestik arqyly klıentterge «Otbasy bank» AQ-nan ıpotekalyq nesıe alý, jeńildetilgen sharttarmen avtokredıt rásimdeý, sondaı-aq «Damý» qorynyń baǵdarlamalary aıasynda nesıe alý máseleleri boıynsha keńes berý qyzmetterin usynǵan.
Azamattar birneshe mln teńgeden bastapqy jarna tólep, ózin tabysty kásipker retinde kórsetken jigitke sengen. Jalpy, qylmystyq is boıynsha 24 alaıaqtyq deregi tirkelgen. Keltirilgen shyǵynnyń jalpy kólemi shamamen 80 mln teńge. 26 jastaǵy jigit bul qarajatty óz qajetine jumsaǵan. Onyń az ǵana bóligin qaıtarǵan.
Qylmystyq is iri mólsherde birneshe ret alaıaqtyq jasaý deregi boıynsha sotta qaraldy. Pavlodar qalasynyń soty aıyptalýshyny kináli dep tanyp, bastapqyda tórt jylǵa bas bostandyǵynan aıyrý jazasyn taǵaıyndady.
— «Qazaqstan Respýblıkasynyń jańa Konstıtýtsııasynyń qabyldanýyna baılanysty raqymshylyq jasaý týraly» QR Zańynyń 2-baby 3-tarmaǵynyń 1) tarmaqshasyna sáıkes, 2026 jylǵy 13 qazandaǵy jaǵdaı boıynsha bas bostandyǵynan aıyrý túrindegi ótelmegen negizgi jaza merzimin tórtten bir bólikke qysqartyp, tórt jyldan úsh jylǵa deıin tómendetý týraly sheshim qabyldandy, — degen úkimdi jarııa etti úkimdi Pavlodar qalasynyń qylmystyq ister jónindegi mamandandyrylǵan aýdanaralyq sotynyń sýdıasy Ǵabıt Ahmetov.
Aıyptalýshy óz kinásin tolyq moıyndap, jábirlenýshilerdiń azamattyq talaptaryna qarsylyq bildirmegen. Sot keltirilgen zalaldy tolyq kólemde óteýdi mindettedi.
Eske sala keteıik, Pavlodarda birlestik tóraǵasy turǵyndardyń 2,5 mln teńgege jýyq aqshasyn óz qajetine jumsap jibergen.
