Arzan ıpoteka bárine jetedi - mınıstr Qasymbek

ASTANA. QazAqparat - QR Investıtsııalar jáne damý mınıstri Jeńis Qasymbektiń aıtýynsha, 7 paıyzdyq ıpotekaǵa salynatyn qarjy barlyǵyna jetýi tıis, dep habarlaıdy QazAqparat tilshisi.

«Shyny kerek, arzan ıpoteka boıynsha jumys isteıtin jańa kompanııanyń sharttary óte tıimdi bolady. Jyldyq mólsherleme - 7 protsent, merzimi - 25 jyl. Sosyn alǵashqy jarna da Turǵyn úı qurylys jınaq bankimen salystyrǵanda tıimdi bolyp tur. Ol jaqta alǵashqy jarna 30-50 protsent bolsa, jańa baǵdarlamada 20 protsent qana. Árıne, halyq tarapynan ondaı sharttarǵa suranys joǵary bolady. Sonyń arqasynda ıpoteka men qurylys salasy jandana túsedi», - dedi J.Qasymbek Úkimet otyrysynan keıingi baspasóz máslıhatynda. 

Mınıstrdiń aıtýynsha, bir aptanyń ishinde Ulttyq bankpen birge jańa baǵdarlamany iske asyrý jospary daıyndalady. Atalǵan qujatta arzan ıpotekany berýdiń naqty joldary kórsetiledi. «Qazirgi kezde Turǵyn úı qurylys jınaq banki barlyq ıpotekanyń jartysynan kóbin alyp otyr. Menińshe, jańa kompanııanyń kelýimen báseke qyza túsedi. Álbette, halyq arzan ıpotekany asyǵa kútip otyr. Kompanııa qurylǵannan keıin adam kezegi de kóbeıdi. Ony da jaqsy túsinemiz. Alaıda Memleket basshysy ıpoteka salasyna bir trıllıon teńgege deıin qarjy tartýdy tapsyrǵan bolatyn. Sondyqtan jańa baǵdarlamany qarbalassyz iske asyrylýy tıis», - dep atap kórsetti J.Qasymbek.

Aıta keteıik, Parlament palatalarynyń birlesken otyrysynda Memleket basshysy Nursultan Nazarbaev qazaqstandyqtardy baspanamen qamtamasyz etýdiń jańa baǵdarlamasyn ázirleýdi tapsyrdy. Osyǵan baılanysty QR Ulttyq banki janynan 7 protsenttik ıpotekany beretin jańa kompanııa qurylady.