Arzan ımport dáýiri aıaqtaldy: TEMU Túrkııadaǵy halyqaralyq satylymdaryn toqtatty

ASTANA. KAZINFORM — Qytaılyq TEMU marketpleısi Túrkııadaǵy paıdalanýshylarǵa taýarlar satýdy toqtatty. Platformada endi tek el ishinde jumys isteıtin satýshylardyń ónimderi qoljetimdi, dep habarlaıdy Kazinform menshikti tilshisi. 

Ózgerister ótken aptada TEMU-dyń Túrkııadaǵy keńsesinde eldiń Monopolııaǵa qarsy vedomstvosy júrgizgen tekserýden keıin engizildi. dunya.com basylymynyń habarlaýynsha, buǵan deıin keńse kompıýterleri tárkilengen bolatyn, alaıda retteýshi organ bul aqparatty joqqa shyǵaryp, másele resmı tergeý emes, tek aldyn ala tekserý týraly bolǵanyn basa aıtty.

Monopolııaǵa qarsy organ terkserýdi tıisti túrde júrgizý jáne taraptardyń quqyqtaryn qorǵaý maqsatynda protsestiń egjeı-tegjeıi ázirge jarııalanbaıtynyn málimdedi. Ári qaraı qadam týraly aqparat keıinirek jarııalanady.

Tekserýden keıin TEMU Túrkııaǵa barlyq halyqaralyq satylymyn toqtatty. Platformanyń mobıldi qosymshasynda jáne platforma saıtynda endi sheteldik satýshylardyń ónimderi qoljetimdi emes. Qazirgi ýaqytta TEMU tek túrik satýshylary usynylǵan jergilikti naryqqa aınaldy.

Belgili bolǵandaı, bul jaǵdaı arzan ımportqa qarsy budan da qatań saıasat aıasynda damyp keledi. TEMU buǵan deıin Eýropalyq Odaq elderinde ishki naryqtarǵa qysym jasaǵany úshin synǵa ushyraǵan bolatyn, al ótken aıda onyń Dýblındegi Eýropalyq keńsesi tekserildi.

Taǵy bir faktor Túrkııadaǵy zańnamalyq ózgerister boldy. 7 qańtardan bastap shetelden 30 eýroǵa deıingi salyqsyz onlaın satyp alýlar týraly norma joıyldy, bul túrik tutynýshylary úshin «salyqsyz» ınternet-shopıng dáýirin aıaqtady.