Arzan gaz, bilim granttary, áleýmettik tólemder: munaı-gaz salasynyń úlesi qandaı
ASTANA. KAZINFORM – Aimaq podkastynda Energy Monitoring qorynyń dırektory Nurlan Jumaǵulov munaı-gaz salasynyń halyqtyń áleýmettik ál-aýqatyna qosyp otyrǵan úlesin durys túsindirý kerektigin aıtty.
Onyń aıtýynsha, memleket munaı-gaz salasynyń el ekonomıkasyna jáne halyqtyń áleýmettik ál-aýqatyna qosyp otyrǵan úlesin jurtshylyqqa túsinikti tilde jetkizýi kerek. Óıtkeni, memlekettik shyǵystardyń edáýir bóligi áleýmettik salaǵa, bilim berý men densaýlyq saqtaýǵa baǵyttalady.
- Halyq munyń bárin qalaı túsinýi kerek? Zeınetaqy ýaqytynda tólene me? Bilim alý múmkindigi bar ma? Mysaly, mektep bitirýshilerdiń shamamen 150–180 myńynyń 80 myńyna memlekettik grant beriledi. Demek, árbir ekinshi túlek grantqa ıe bola alady, – dedi ol.
Sonymen qatar Nurlan Jumaǵulov Qazaqstanda tabıǵı gaz ben avtogaz baǵasynyń salystyrmaly túrde tómen ekenin atap ótti.
Onyń sózinshe, kórshi eldermen salystyrǵanda Qazaqstanda avtogaz tutynýshylar úshin qoljetimdi baǵamen satylyp otyr. Tipti avtogaz baǵasynyń qoljetimdiligi jaǵynan ekinshi orynda tur. Munaı-gaz kompanııalary ishki naryqty janar-jaǵarmaımen qamtamasyz etýge de úles qosady. Máselen, eksporttyq naryqta munaıdyń tonnasy shamamen 250 myń teńge tursa, kompanııalar ony otandyq munaı óńdeý zaýyttaryna shamamen 100 myń teńgeden jetkizedi. Munyń maqsaty – benzın men dızel otynyn ishki naryqta qoljetimdi baǵamen satý.
- Bul – memlekettiń jáne munaı-gaz kompanııalarynyń ekonomıkaǵa qosyp otyrǵan úlesi. Osyny qarapaıym halyqqa durys túsindirý kerek, – dedi sarapshy.
Budan bólek, ol munaı-gaz kompanııalary bilim berý salasyna da qarjy bóletinin aıtady. Onyń málimetinshe,, olar memlekettik grantqa túse almaǵan túlekterge arnap qosymsha bilim granttaryn taǵaıyndaıdy. Mundaı qoldaýdyń jyl saıynǵy jalpy kólemi shamamen 15 mlrd teńgeni nemese 30 mln dollardy quraıdy.
Buǵan deıin munaıshylarymyz nege shetelge ketip jatqanyn jazǵan edik.
