Arystyń zııaly qaýymy Abaıdyń aýylyna attandy

ARYS. QazAqparat - Arys qalasynyń ákimi Murat Qadyrbektiń bastamasy boıynsha qalalyq ishki saıasat bóliminiń uıymdastyrýymen Arys qalasynan Shyǵys Qazaqstan oblysyna arnaıy ekspedıtsııa attandy, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.

Uly aqyn Abaıdyń 175 jyldyq merekesine oraı, aımaqtaǵy zııaly qaýym ókilderi men jastardan jasaqtalǵan «Arys qalasynan - uly Abaıdyń aýylyna» dep atalatyn tanymdyq ekspedıtsııa múshelerin qala ákimi arnaıy qabyldap, sátti sapar tiledi.

Ekspedıtsııa áýeli Qarakereı Qabanbaı batyrǵa máńgilik meken bolǵan shyǵystyń juldyzy Óskemen qalasyna taban tiredi. Onda arnaıy top batyr eskertkishine taǵzym jasady. Keıin ekspedıtsııa uly aqynnyń eli Semeı qalasyna jol tartty. Onda Abaı eskertkishine gúl shoqtaryn qoıdy. Ibrahımniń oqyǵan Ahmet Rıza meshit-medresesine aıaldady. Sondaı-aq, «Alash arystary» mýzeıine arnaıy aıaldap, ondaǵy qundy jádigerlermen tanysty. Taǵylymy mol tanymdyq sapar 30 qarashaǵa deıin jalǵasady.