Arystyń bas qaqpasynyń lentasy saltanatty túrde qıyldy

ARYS. QazAqparat - Qalanyń kireberis qaqpasy Arys shaharynyń taǵy bir sáýletti týyndysyna aınaldy. Jańa nysannyń qurylys jumystaryn moınyna alyp, qarjylandyrǵan - QR Kásipodaqtar federatsııasy, dep habarlaıdy QazAqparat oblys ákiminiń baspasóz qyzmetine silteme jasap.

Ashylý saltanatyna QR Kásipodaqtar federatsııasynyń tóraǵasy Eraly Toǵjanov pen Túrkistan oblysynyń ákimi Ómirzaq Shókeev arnaıy qatysyp, turǵyndarǵa jyly lebiz bildirdi.

«Óńirimizdegi sáýlettik jobalardyń ulttyq naqyshta bolǵany quba-qup. Qazaqylyqtyń qaımaǵy buzylmaǵan aýmaqty aıshyqtaıtyn kórinister jańa jobalarda kórinis tapqanyna nazar aýdarý óte mańyzdy. Maýsymdaǵy qaıǵyly oqıǵadan keıin qolǵa alynǵan Arys qalasyn jaqsylyqqa bastaıtyn berekeli qaqpa bolady dep senemin», - dedi aımaq basshysy Ómirzaq Estaıuly.

Sonymen qatar, aımaq basshysy óz sózinde qaqpanyń qurylysyn qoldap, kómek bergen elimizdiń Kásipodaqtar federatsııasy basshylyǵyna alǵysyn bildirdi. Kez kelgen shahardyń ózine tán qaıtalanbas, aıryqsha kelbeti bolady. Osyndaı mazmuny men maǵynasy zor aıtýly jobaǵa Qazaqstan Respýblıkasy Kásipodaqtar federatsııasy demeýshilik jasaǵan.

Arys qalasynyń kórkeıip, gúldenýine bir kisideı jumyla kirisý - búkil elge ortaq is boldy. Qalanyń bas qaqpasy - sonyń taǵy bil dáleli bolsa kerek.

Saltanatty jıynǵa «Nur Otan» partııasy Arys qalalyq fılıalynyń tóraǵasy men ardagerler, qalalyq máslıhat depýtattary qatysty. Ashylǵan qaqpadan alǵashqy bolyp oblys ákimi Ómirzaq Estaıuly bastaǵan top jaıaý júrip ótti.