Arystyqtarǵa Prezıdent Joldaýy túsindirildi

ARYS. QazAqparat – Túrkistan oblysy, Arys qalasynda Memleket basshysy Qasym-Jomart Toqaevtyń «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty halyqqa Joldaýyn keńinen nasıhattaýǵa arnalǵan jıyn ótti, dep habarlaıdy QazAqparat tilshisi.

Basqosýda el turǵyndarynyń ómiri men sapaly turmysyn jaqsartýda, ekonomıkasy damyǵan, áleýeti joǵary memleket qalyptastyrýda Joldaýda qoıylǵan basymdyqtardyń mańyzy óte zor ekeni aıtyldy. Qala ákiminiń orynbasary Saparbaı Dáribaıdyń tóraǵalyǵymen ótken jıynda Joldaý keńinen túsindirilip, ony júzege asyrý joldary talqylandy. Jıynǵa jazýshy, qoǵam qaıratkeri Myrzageldi Kemel, «Shańyraq» jastar men jas otbasylardy qoldaý ortalyǵy» qoǵamdyq birlestiginiń basshysy Sabıra Baızaqova, qala ákimdiginiń, mekemeler jáne kásiporyn qyzmetkerleri, úkimettik emes uıym músheleri men jastar qatysty.

Basqosý barysynda baıandamalar oqylyp, qatysýshylar tarapynan suraqtar qoıyldy. Ózara pikir almasýlar bolyp, jıynǵa qatysýshylar óz oılaryn ortaǵa saldy. Aıta keteıik, Memleket basshysynyń Joldaýyn nasıhattaý sharalary óńirdiń ózge aýdan-qalalarynda da ótýde.