Arystyqtar Tuńǵysh Prezıdent kúni merekesin atap ótti

ARYS. QazAqparat –Túrkistan oblysynyń Arys qalasynda 1 jeltoqsan – Qazaqstan Respýblıkasynyń Tuńǵysh Prezıdenti kúnine arnalǵan merekelik jıyn ótti. Oǵan qala ákiminiń orynbasary Rysdáýlet Aıtbaev pen mekeme, bólim basshylary, din jáne zııaly qaýym ókilderi qatysty, dep habarlaıdy QazAqparat tilshisi.

Saltanatty sharaǵa etnomádenı ortalyqtardyń ókilderi men úkimettik emes jáne qoǵamdyq uıymdardyń jetekshileri de shaqyryldy. Rysdáýlet Aıtbaev qala halqyn aıtýly merekemen quttyqtap, aıtýly kúnniń mańyzdylyǵyna toqtaldy.

«Táýelsizdiktiń araıly tańy atqan shırek ǵasyrdan astam ýaqyt ishinde elimizdi kúlli álem tanyp, moıyndaǵan eńseli memleketke aınaldy. Elbasy halyqty orasan zor isterge jumyldyrdy, qoǵamdaǵy tatýlyq pen kelisimdi nyǵaıtý isinde álem úlgi alarlyq saıasat ustandy. Elimizdiń syrtqy saıası baǵytyn dál nusqap, tuńǵysh ret qazaq memleketiniń shekarasyn aıqyndady, tórtkúl dúnıege teń terezeli el retinde moıyndatty. Mine, sondyqtan da álemniń saıasatkerleri Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevty Qazaqstan memlekettiliginiń negizin qalaýshy jáne búkil halyqaralyq qoǵamdastyqtyń rızashylyǵy men qurmetine ıe bolǵan jahandyq, óńirlik beıbit bastamalardyń avtory retinde tanıdy», – dedi Rysdáýlet Aıtbaev.

Ol sonymen qatar qalanyń áleýmettik-ekonomıkalyq damýyna úles qosqan birqatar azamatty alǵys hattarmen marapattady. «Elbasy – eldiń tiregi» taqyrybynda ótken saltanatty sharada myń buralǵan bıshiler men kúmis kómeı ánshiler Arys aspanyn ánge bóledi.