Arystyqtar qala kúnin atap ótti

ARYS. QazAqparat - Arys qalasynyń ortalyǵy ál-Farabı alańynda qala kúni toılandy. Merekelik is-sharaǵa jergilikti bılik ókilderi, turǵyndar jáne arnaıy kelgen qonaqtar qatysty, dep habarlaıdy QazAqparat.

Túrkistan oblysy ákiminiń baspasóz qyzmetinen málim etkendeı, bul kúni jarylystan keıin qalany qaıta qalpyna keltirýge úles qosqan azamattarǵa, eren eńbektiń úlgisin kórsetken dala eńbekkerlerine «Eńbek dańqy» tósbelgileri tabystaldy. Sondaı-aq birqatar tulǵa alǵys hattarmen, Qurmet gramotalarymen jáne baǵaly syılyqtarmen marapattaldy.

Arys aspanyn ánge bólegen mereke odan ári kontserttik baǵdarlamaǵa ulasyp, óner ıeleri jınalǵan qaýymǵa án men bıden shashý shashty. Sondaı-aq Arys qalasynda dástúrge aınalǵan «Altyn kúz – 2019» jármeńkesi ótti. «І-Arys» temirjol vokzaly aldyndaǵy alańshada sharýalardyń óndirgen ónimderi arzan baǵada halyqqa usynylyp, kórme uıymdastyryldy. «Altyn kúz – 2019» jármeńkesine Aqdala, Baıyrqum, Jıdeli, Dermene, Montaıtas, Qojatoǵaı aýyldyq okrýgterinen kelgen sharýa qojalyqtary men jeke kásipkerler óz taýarlaryn naryqtaǵydan 20-30 paıyzǵa tómen baǵada usyndy.