Arystyq oqýshylar Almatyǵa demalýǵa keldi
Almatylyqtar Arystyq oqýshylardy «Vokzal-2» beketinde sán-saltanatpen qarsy aldy. Ár oqýshyǵa estelik syılyqtar taratyldy. Tsırk ártisi Murat Muturǵanov otbasymen óner kórsetti. Anımatorlyq kórinis pen kolledj stýdentteri ázirlegen «Arys, Biz birgemiz!» atty fleshmoby balalardyń kóńilin kóterdi.
«Almaty qalasy ákimdiginiń qoldaýymen shildeniń 12-nen tamyzdyń 3-ne deıin arystyq balalar qala syrtyndaǵy «Órnek» jazǵy saýyqtyrý lagerinde tynyǵady. Arnaıy baǵdarlamaǵa sáıkes oqýshylar qalanyń kórikti jerlerin aralaıdy. Sondaı-aq, psıhologtar ár balamen jeke-jeke jumys isteıdi. Qajet bolsa kıimmen de qamtamasyz etemiz. Búgin oqýshylardyń alǵashqy legi keldi. Jalpy, 150 bala demalady. Qalǵan 75 oqýshy tamyzda keledi. Bul sharany uıymdastyrýǵa qalalyq ákimdik 10 mln. teńge bóldi», - dedi Almaty qalalyq bilim basqarmasynyń basshysy Gúlnár Hodjabergenova.
Sonymen qatar, bul týraly Almaty ákimi Baqytjan Saǵyntaev Instagram jelisinde jazba jarııalady.
«Arystan kelgen baldyrǵandardy qarsy aldyq. Balalardy vokzaldan tikeleı demalý jáne kúsh jınaý úshin «Órnek» jazǵy saýyqtandyrý lagerine jetkizdik» - dedi ákim.
