Arystyq qos aıaǵynan aırylǵan azamat kásip bastady
Arys qalasynyń turǵyny, ІІ top múgedegi Vıacheslav Naýmenko fotostýdııa ashyp, halyqqa qyzmet kórsetýdi bastady. Tilsiz jaýdyń kesirinen eki aıaǵynan aıyrylǵan azamat budan aldyn turmystyq tehnıka jóndeýmen aınalysqan bolatyn.
«Kórshimniń keńesimen Arystaǵy Jumyspen qamtý ortalyǵyna bardym. Ol jaqtaǵy mamandar memlekettik grant boıynsha konkýrsqa qatysýǵa múmkindigim baryn aıtyp, sharttaryn tolyq túsindirip berdi. Ózimniń tehnıkaǵa ebim bar. Sondyqtan fotostýdııa ashýdy tańdadym. Komıssııa aldynda jobamdy sátti qorǵap shyqtym», - deıdi ol.
Vıacheslav Naýmenko nátıjeli eńbek jobasy arqyly memleketten 1 380 000 teńge qaıtarymsyz grant utyp aldy. Úkimet qoldaýymen berilgen qaıtarymsyz qarajatqa fotoapparat, kompıýter, prınter men arnaıy qaǵaz satyp alǵan.
Búgingi kúni eńbekke qushtar azamat mektep túlekteriniń vınetkalaryn, merekelik shaqyrý bıleti men túrli formattaǵy dızaın túrin jáne toıtabaq ázirleýdi de qolǵa alyp otyr. Sonymen qatar fotoǵa túsirip, sýretti ásemdep, arnaıy árippen jazý men qýanyshty otyrysty bezendirý sekildi qyzmetterdi de jolǵa qoıǵan.
«Kásip bastap, tabys tabýǵa mol múmkindik usynǵan memleketke alǵysym sheksiz. Aldaǵy ýaqytta kásibimdi damytyp, ulǵaıtýdy josparlap otyrmyn» - deıdi ol.
