Arystyq dárigerlerdiń eńbekaqy máselesi qalaı sheshiledi

NUR-SULTAN. QazAqparat - Arystaǵy aýrýhana iske qosylǵanǵa deıin medıtsına qyzmetkerleri jumyssyz otyrmaıdy. Bul týraly QR Densaýlyq saqtaý mınıstri Eljan Birtanov ortalyq kommýnıkatsııalar qyzmetinde ótken brıfıngte aıtty, dep habarlaıdy QazAqparat tilshisi.

Eljan Birtanov brıfıng barysynda arystyq dárigerlerdiń eńbekaqy máselesi qalaı sheshiletinin aıtty.

«Emhananyń jumysy jandanatynyn aıttym. Qazir jyljymaly jasaqtar jumys istep jatyr. Jańa nysandar boı kótergenshe ondaǵy aq jeleńdi mamandar jumyssyz qalmaıdy. Ár dárigerdiń jaǵdaıy jeke qaralatyn bolady. Bir bóligi kórshiles eldi mekenderge jiberilse, taǵy bir bóligi eńbek demalysyn alady. Eń bastysy, bir de bir dáriger eńbekaqysyz qalmaıdy. Tıisti jalaqysy tolyq tólenip otyrady. Bul másele Arys qalasyna barǵan úkimettik delegatsııanyń aldyna da qoıylǵan bolatyn», - dedi ol.

Sondaı-aq, mınıstr jarylys kezinde ýlanǵandar da bolǵanyn jetkizdi.

«Apat saldarynan 410 adamnyń medıtsınalyq kómekke júgingenin aıttyq. Qazir onyń kóbi jazylyp, úıine qaıtty. Jaraqattardyń sıpatyna keler bolsaq, aýrýhanaǵa túskenderdiń kóbi mı jaraqatyn alǵan. Jansaqtaý bólimindegi eki naýqas ta kúrdeli mı jaraqatymen kúresip jatyr. Budan bólek, tútinge ýlanyp, densaýlyǵy nasharlaǵandar da boldy. Órt kezinde otqa kúıgender de bar», - dedi mınıstr.

Aıta ketsek, munyń aldynda densaýlyq saqtaý mınıstri Eljan Birtanov Arysta jańa emhana men aýrýhana salynatynyn aıtqan bolatyn. Sondaı-aq, Arystaǵy jarylystan zardap shekken eki adam áli jansaqtaý bóliminde jatyr.