Arysty shaǵyn qalalardy damytý baǵdarlamasynyń tizimine engizý kerek - Q. Aıtahanuly
ASTANA. 7 maýsym. QazAqparat - Búgin QR Parlamenti Cenatynyń jalpy otyrysynda senator Qýanysh Aıtahanuly Úkimet basshysynyń atyna saýal joldady.
Onda depýtat eldiń ońtústigindegi Arys qalasynyń áleýmettik-ekonomıkalyq jaǵdaıyn kóterý joldaryn qarastyrýdy surady.
Senatordyń aıtýynsha, búgingi tańda Arys qalasynda 50 myńǵa jýyq halyq turady. Temirjoldyń úsh baǵyty túıisetin Arys qalasynyń negizgi kiris kózi osy temir jol bolyp sanalady. Keńes úkimeti kezinde Orta Azııa qaqpasy atalatyn Arys stansasynda kúnine 125 poezd qurastyrylyp, 3 baǵytta jóneltilip jatty. Qalada lokomotıv, vagon depolary, shpal óńdeý zaýyty jáne taǵy basqa kóptegen temir jol mekemeleri, saýda, qoǵamdyq tamaqtandyrý oryndary jumys istep, jergilikti turǵyndar jumys oryndarymen tolyq qamtylǵan bolatyn. «Al sońǵy 20 jylda Arys temirjol stansasynyń júk qozǵalysy 5 ese azaıyp, tıisinshe jumysshylar sany da qysqarýǵa ushyrady. 1904 jyly iske qosylǵan Orynbor - Tashkent temirjolynda jumys isteıtin temirjolshylardyń altynshy býyny bul kúnderi jumyssyzdyq pen jumystan qysqartylý qaýpimen moraldyq jáne materıaldyq turǵyda qıyndyqtar kórýde», - deıdi senator Qýanysh Aıtahanuly.
Onyń paıymynsha, atalǵan máseleni sheshýdiń birden-bir joly - Elbasy N. Nazarbaevtyń Joldaýynda aıtylǵan bir salany tirek etetin shaǵyn qalalardy damytý baǵdarlamasynyń tizimine Arys qalasyn engizý. Osy arqyly ozyq tehnologııamen jumys isteıtin, temirjol salasyna qajetti bólshekter shyǵaratyn óndiris oryndaryn ashý. «Bul, temirjolshylar qalasy atanatyn Arystyń áleýmettik-ekonomıkalyq jaǵdaıyn jaqsartyp, qala turǵyndaryn jumyspen qamtýǵa yqpal eter edi», - deıdi depýtat.
