Arysty qalpyna keltirý jumystary 99 paıyzǵa aıaqtaldy - mınıstr

NUR-SULTAN. QazAqparat – Aqparat jáne qoǵamdyq damý mınıstri Dáýren Abaev Arysty qalpyna keltirý jumystary 99 paıyzǵa aıaqtalǵanyn málim etti, dep habarlaıdy QazAqparat tilshisi.

«Arysty qalpyna keltirý jumysy 99 paıyzǵa aıaqtaldy. Orasan zor eńbek atqaryldy. Arysty qalpyna keltirý jumysyn úlken ári teńdessiz erlikke teńer edim. Bar-joǵy úsh aıdyń ishinde qala tolyǵymen qalpyna keltirildi. Elbasy men Prezıdent jumysty jedel ári sapaly túrde júrgizýdi tapsyrdy. Premer-Mınıstr qalpyna keltirilip jatqan oryndardy alty nemese jeti ret kelip aralap ketti, qurylys barysyn baqylap, turǵyndarmen kezdesti. Bıznesmender óz qarjysymen tutas nysandardy kóterdi. Eldiń túkpir-túkpirinen kelgen volonterlar qurylys nysandarynda eńbek etti. Áskerıler, qutqarýshylar, jergilikti turǵyndar – eshkim shette qalǵan joq. Qala burynǵydan da kórkeıe tústi. Bunyń bári de túsinistik bolsa, kez kelgen qıyndyqty eńserýge bolatynyn kórsetedi», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.

Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Keıin zardap shekkenderge kómek qolyn sozý maqsatynda elimizde «Arys, biz birgemiz» aktsııasy bastaldy.