Arysty qalpyna keltirý Prezıdenttiń jeke baqylaýynda - Berdibek Saparbaev
Mınıstrlik basshysy turǵyndardy qaýesetke senbeýge jáne arandatýshylyqqa boı aldyrmaýǵa shaqyrdy.
«Arysty qalpyna keltirý Prezıdent Qasym-Jomart Toqaevtyń jeke baqylaýynda. Qalany, áleýmettik nysandardy, turǵyn úı men ınjenerlik ınfraqurylymdy jóndeý jáne qalpyna keltirý úshin barlyq qajetti qarajat bólý týraly Úkimetke tıisti tapsyrma berildi. Sizderden arandatýshylyqqa boı aldyrmaýlaryńyzdy jáne qaýsetke senbeýlerińizdi suraımyn. Úkimet pen jergilikti organdar tarapynan qajetti máselelerdiń barlyǵy sheshilýde», - dedi mınıstr.
Mınıstr qıyn sátte búkil Qazaqstan Arys turǵyndaryna qoldaý kórsetetip jatqanyn atap ótti.
«Elimizdiń túkpir-túkpirindegi azamattardan kómek kelip túsýde. Barlyq qarajat pen gýmanıtarlyq kómek sizderge ashyq jáne ádil túrde bólinip beriletin bolady. Bul úshin quramyna sizderdiń ókilderińiz kiretin qoǵamdyq komıssııa qurylady. Bul másele erekshe baqylaýda», - dedi Eńbek mınıstri arystyqtarǵa qaratyp aıtqan sózinde.
Sonymen qatar, áskerı bólimniń Arys qalasynan kóshiriletindigin de aıtty.
«Prezıdenttiń tapsyrmasymen áskerı bólimdi Arys qalasynan qaýipsiz jerge kóshirý máselesin sheshetin komıssııa jumys istep jatyr. Basty mindet - bolashaqta apattyń qaıtalanýyna jol bermeý. Ekologııalyq jaǵdaı da nazardan tys qalmaıdy. Jaqyn arada jaǵdaı qalpyna keledi, sol sebepti sizderdi sabyrlyq pen shydamdylyqqa shaqyramyn», - dedi B.Saparbaev.
Sapar barysynda Eńbek mınıstri Arys qalasyndaǵy jarylys kezinde zardap shekkender em alyp jatqan №35 medıtsınalyq jedel-járdem aýrýhanasy men №1 balalar aýrýhanasyna bardy. Mınıstr dárigerlermen jáne jaraqattanǵandarmen áńgimelesip, zardap shekkenderdiń tez arada saýyǵyp ketýine tilektestik bildirdi. Sondaı-aq, B. Saparbaev Arys qalasynyń turǵyndarynyń qazirgi ýaqyttaǵy jaı-kúıimen tanysý úshin olardy ýaqytsha ornalastyrǵan "Daryn" mektep-ınternatynda, balalar úıinde jáne №89 orta mektepte boldy.
