Arystandardan qashqan 400 býıvol ózenge batyp ketti
ASTANA. QazAqparat - Botsvanada Ulttyq park aýmaǵynda 400 býıvol Chobe ózenine batyp ketti. Bul týraly Botsvana Qorshaǵan orta, tabıǵı resýrstar jáne týrızm mınıstrligi málim etti, dep habarlaıdy QazAqparat el úkimetiniń Feısbýktegi resmı paraqshasyna silteme jasap.
Chobe ózeni Botsvana men Namıbııanyń shekarasynan ótedi. Sýǵa ketpes buryn 400 býıvol Namıbııanyń aýmaǵynda bolǵan.
Vedomstvonyń málimdeýinshe, janýarlardyń sýǵa batý sebepteri áli belgili emes. Joramaldarǵa qaraǵanda, jabaıy ógizder arystandardyń shabýylynan qashyp júrip sýǵa ketken bolýy múmkin. Janýarlardyń birazynyń denesi ózennen shyǵaryp alynǵan.
