Arystanbek Muhamedıuly Úkimet otyrysynda mınıstrlerdi dý kúldirdi

ASTANA. QazAqparat - Búgin Úkimettiń selektorlyq rejimdegi otyrysynda elimizdiń Mádenıet jáne aqparat mınıstri Arystanbek Muhamedıuly týrızm salasynda ekonomıka damytý jaıynda baıandama jasady, dep habarlaıdy QazAqparat.

Onyń atap ótýinshe, elimizdiń klımattyq ereksheligine baılanysty birqatar nysanaly ındıkatorǵa qol jetkizý birshama qıyn.

«Týrızm salasy úshin eń jaqsy maýsym jaz ben kúz aılary ekendigi túsinikti. Biz jyldyń sońynda barlyq kórsetkishterdi oryndaıtyn bolamyz. Ekinshiden, Baqytjan Ábdiruly, teatr, mýzeı, kitaphana jáne botanıkalyq baqqa barý syndy kórsetkishterdi oryndaı almaımyz. Indıkatorǵa, ádisnamaǵa esh qarsylyǵymyz joq. Biraq, qańtar men aqpanda, naýryzda attraktsıondarǵa barý óte qıyn, sýyq. Zoologııalyq park, botanıkalyq baqta», - dedi mınıstr.

«Jazda ystyq, qysta sýyq qoı», - dep kúldi Premer-Mınıstr Baqytjan Saǵyntaev.  Osydan keıin Úkimet basshysyna ilese otyrysqa qatysyp otyrǵan barlyq mınıstrler de dý kúldi.

«Kúlemiz, biraq jumys ta isteý kerek. Qurmetti mınıstrler 24 nysanaly ındıkatordyń  9 boıynsha arta qalyp otyrmyz. Mundaı tájirıbeni alǵash ret engizdik jáne sizderdiń barlyq dálelderińizdi qabyldamaımyn. Jumys isteńizder, nátıje berińizder. Memleket basshysy kútip otyr. Orta merzimdi kezeńde 5 paıyz ósim kórsetý tapsyrmasyn júktedi. Eger barlyq ýaqytta ádisnamaǵa, statıstıkalyq eseptilikke, tabıǵatqa silteı beretin bolsaq, júktelgen mindetti esh ýaqytta oryndaı almaımyz», - dedi Baqytjan Saǵyntaev.