Arystanbek Muhamedıuly týrızmdi damytýǵa qaı salanyń mamandary tartylatynyn aıtty
ASTANA. QazAqparat - Búgin Astanada Travel Media Talks forýmynda QR Mádenıet jáne sport vıtse-mınıstri Aqtoty Raıymqulova osy vedomstvonyń mınıstri Arystanbek Muhamedıulynyń baıandamasyn oqyp berdi. Mınıstr forým qatysýshylaryna Qazaqstanda týrızm salasyn damytýdyń mán-jaıyn atady, dep habarlaıdy QazAqparat.
«Sońǵy onjyldyqta álemdik týrızm qarqyndy damyp kele jatyr, jahandyq ekonomıkalyq daǵdarystar kezinde de bul sala ekonomıkada turaqtandyrýshy retinde yqpal etti», - dedi mınıstr.
Sonymen qatar ol búginde týrızmdi damytý boıynsha vedomstvo ázirlep jatqan baǵdarlama týraly aıtyp berdi.
«Týrızm salasynyń ósim qarqyny álemdik ekonomıka salasynyń ósim qarqynynan bir paıyzǵa ilgeri bolady dep kútilýde. Osy sala Qazaqstan ekonomıkasy úshin de mańyzdy bolyp tur. Otandyq týrıstik ındýstrııany damytý úshin Memleket basshysynyń tapsyrmasymen tıisti memlekettik baǵdarlama ázirlenýde», - dedi A. Muhamedıuly.
Onyń sózine qaraǵanda, memlekettik baǵdarlamanyń negizgi baǵyty retinde ishki jáne shetel týrısterin laıyqty deńgeıde aqparattandyrý belgilengen.
«Uzaq ýaqyt boıy týrıstik brendti ilgeriletýge jetkilikti deńgeıde kóńil bólinbedi. Nátıjesinde, aqparattyq vakým týyndady. Bul turǵyda BAQ-ty, salmaqty usynys jasaı alatyn adamdardy, fotograftardy, saıahatshylardy jáne týrızm mamandaryn jumyldyrsaq, onda osy vakýmdy týrızm úshin ózekti, qyzyqty ári paıdaly kontentpen tolyqtyra alamyz. Sondyqtan bul forýmǵa medıaındýstrııanyń, týrıstik salanyń ókilderin, sheteldik sarapshylardy shaqyrdyq», - dedi ol.
Osy oraıda vedomstvo basshysy jahandyq tsıfrlandyrý jaǵdaıynda týrızmdi ilgeriletýdiń ózekti joldaryn talqylaı otyryp, Qazaqstanda bul salany damytýǵa tıimdi sheshimder jasaýǵa bolatyndyǵyn atap ótti.
