Arystanbek Muhamedıuly sportshylar úshin alańdap otyrǵanyn málimdedi

ASTANA. QazAqparat - Sportshydan anyqtalǵan dopıng úshin bapkerden bastap memlekettik organǵa deıin jaýap berýi tıis. Bul týraly búgin Parlament Májilisiniń jalpy otyrysynan keıin tilshiler saýalyna jaýap berý barysynda QR Mádenıet jáne sport mınıstr Arystanbek Muhamedıuly málim etti.

«2017 jyly dopıngti paıdalaný máselesine qatysty zań jobasyn engizýdi qarastyrýdamyz. Ne úshin? Qazirgi kezde kináli retinde tek sportshylar qalyp otyr. Al sol kezde sportqa basshylyq etken adamdar qaıda? Nelikten sportshylarǵa qaraǵan dárigerge jaýapkershilik júktelmegen? Endi sol kezde eldiń abyroıyn qorǵaýǵa barǵan azamattardy problemalarymen jalǵyz qaldyrǵanymyz durys emes. Sportshylar medal alǵan kezde tıisti marapattardy basshylyq etkender de aldy ǵoı»,-dep toqtaldy Muhamedıuly.

Osy oraıda mınıstr dopıng úshin jaýapkershilikti zańnamamen bekitiletindigin atap ótti. Onda sportshydan bólek dárigerge, bapkerge, quzyretti memlekettik organǵa júkteletin jaýapkershilik tyńǵylyqty jazylmaq. «Qazirgi kezde bizdiń sportshylarǵa, ıaǵnı Ilıa Ilın men qıyn jaǵdaıǵa tap bolǵan basqa da aýyr atletterimizge alańdap otyrmyn»,-dedi mınıstr.

Eske sala keteıik, osyǵan deıin HOK-tiń Qazaqstan atynan jarysqa shyǵyp júrgen birqatar aýyr atletterdiń medalin qaıtarý týraly sheshim shyǵarǵandyǵy jarııalanǵan bolatyn.