Arystanbek Muhamedıuly Shymbulaq pen Aqbulaq arasynda aspaly jol júrgizýdi usyndy
ALMATY. QazAqparat - QR Mádenıet jáne sport mınıstri Arystanbek Muhamedıuly Іle Alataýyndaǵy týrıstik marshrýtty jaıaý aralap keldi, dep habarlaıdy QazAqpart tilshisi.
8 shaqyrymǵa sozylǵan soqpaq Medeýden Almaty oblysyndaǵy Almataý lagerine deıin sozylyp jatyr.
«Ekotýrızm álemde jaqsy damyǵan sport túrine jatady. Bul sport túri ekonomıkaǵa mýltıplıkatıvti áser beredi. Bul bir jaǵynan, ekologııany taza saqtaýǵa múmkindik berse, ekinshi jaǵynan ekonomıkaǵa qarjy tartady. Men ózim sportpen aınalysamyn. Búgingi serýen óte qyzyqty boldy. Oblystyq deńgeıdegi birneshe sheneýnik, belgili sportshylar, ártister keldi», - dedi mınıstr.
Mınıstrmen birge ekologııalyq sharaǵa qatysqandar soqpaqtardyń jaı-kúıin baqylap, ekotýrızmniń damýyna kedergi bolyp otyrǵan máselelerdi sheshýge tyrysty.
«Ekotýrızmdi damytý óte mańyzdy. Búgingi serýen barysynda biz myna olqylyqtardy kórdik. Adamdar toqtap demalatyn jerlerde oryndyqtar, nusqaýlyqtar, saıalaıtyn oryndar joq. Týrızm salasyna qaýipsizdikti qamtamasyz etetin kompanııalar kerek. Eger osy olqylyqtar jóndelse, Almaty men Almaty oblysy turǵyndarynyń arasynda ekosportqa degen suranys artady», - dedi VeloFriends Raıymbek Batalov.
Mınıstrdiń aıtýynsha, qazir Almaty taýlarynda jańadan qonaq úılerin demalys oryndaryn turǵyzýdyń qajeti joq.
«Tek bar ınfraqurylymdy biriktirý kerek. Máselen Shymbulaq pen Talǵar aýdanyndaǵy Aqbulaqty aspaly jolmen biriktirýge bolady. Qysta bul marshrýttarda shańǵy tebetin adamdar demalsa, jazda jaıaý júretin týrısterge yńǵaıly jaǵdaı týǵyzylady», - dedi A.Muhamedıuly.
