Arystanbek Muhamedıuly Naýryzda áıel zatyna qyzǵaldyq syılaýdy usyndy
«Men Naýryzdy merekeleýde folklorlyq-etnografııalyq qana nyshanynan qutylyp, ony jalpyulttyq deńgeıge kóterip, kóneden kele jatqan qundylyqtardy qalpyna keltirýdi usynǵanymdy bilesizder. Naýryzdy jańa formatta ótkizýdiń basty ıdeıasy - balalarymyz. Naýryz birinshi kezekte bizdiń búldirshinder men jasóspirimderge arnalý kerek. Dostarym, biz bar ıgi isterimizdi ómirimizdiń máni, jalǵasy - jas urpaqqa arnaýymyz kerek», - dep atap ótedi mınıstr.
Onyń atap ótýinshe, Qazaqstannyń barlyq teatrlary men mádenı mekemeleri balalar úılerine, az qamtylǵan jáne kópbalaly otbasylaryna arnap qaıyrymdylyq kontsertterin ótkizip, syılyqtar jasaýda.
«Syılyqqa mindetti túrde ádemi bezendirilgen qorapta jent, shek-shek syndy ulttyq taǵamdardy qosýdy usynamyz. Al syılyqty basqan izi gúldenetin, erteden kele jatqan mıftik keıipker Qydyr Ata usyný kerek. Ańyzǵa súıensek, Naýryzda Qydyr Ata úı-úıdi aralap, ary taza adamdardyń tilekterin oryndap, qut-bereke, baq ákelgen. Osy shýaqty kúnderi barlyq áıel zatyna - kishkentaı qyzdardan bastap aq shashty ájelerimizge deıin kóktemgi jańarýdyń belgisi - qyzǵaldaq gúlin syılaýdy usynamyn. Súıikti analarymyzdy, ápke-qaryndastarymyzdy, jarlarymyzdy, qyzdarymyzdy gúlge bóleıik!», - dedi Arystanbek Muhamedıuly.
Sonymen qatar ol er-azamattar aǵash otyrǵyzyp, balalarǵa gúl egýge kómektesip, jańarýdyń taǵy bir dástúrin qalpyna keltirý qajettigin atap ótti.
«Naýryz kóje men baýyrsaq, qazaqtyń án men kúıi, tusaý keser syndy dástúrin ótkizý - osynyń bári óskeleń urpaqtyń sanasyna ǵasyrlar boıǵy salt-dástúrimizdi sińdirýdiń eń jaqsy múmkindigi. Naýryz meıramy - kóktemgi jańarýdyń, kún men túnniń teńelýiniń, tabıǵattyń jańa jylǵa betburys jasaýynyń kórinisi. Barlyq qazaqstandyqtardy merekemen quttyqtaı otyryp, shańyraqtaryńyzǵa bereke, otbasylaryńyzǵa baqyt tileımin!», - dedi mınıstr.
