Arystanbek Muhamedıuly: Memleket paıdasyna lotereıadan utylý qynjyltatyn is emes

ASTANA. QazAqparat - Lotereıa qyzmetin memleket retteıtin bolsa, árbir qazaqstandyqtyń lotereıada jeńilgen aqshasy memleket qajettiligine jumsalatyn bolady. Bul týraly QR Mádenıet jáne sport mınıstri Arystanbek Muhamedıuly málim etti.

«Qazirgi ýaqytta elde lotereıa qyzmetimen 70 operator aınalysady. Halyqtyń basym bóligi lotereıa qyzmetimen aınalysýǵa qulyqty emes. Sebebi kóp nársesi túsiniksiz. Syıaqy qory da sonshalyqty kóp emes. AQSh-ta máselen 100 mln. dollar utyp jatady. Keshe ǵana bir amerıkalyq 365 mln. dollar utqanyn estidik. Bizdiń elde ondaı senimdilik joq», - dedi ol búgin májiliste lotereıa qyzmetine qatysty jańa zań jobasyn talqylaý barysynda.

Onyń aıtýyna qaraǵanda, lotereıa qyzmetin memleket retteıtin bolsa, árbir qazaqstandyq lotereıada jeńilgen aqshasynyń memleket qajettiligine jumsalatyndyǵyn bile júretin bolady.

«Lotereıaǵa memlekettik retteý ne úshin qajet?! Ár ir qatysýshy onyń aqshasy memlekettik qajettilikterge, áleýmettik salalarǵa jáne memleket paıdasyna túsetinin biletin bolady. Qazir jeńilgen aqshasy jeke tulǵanyń qaltasyna ketetinin túsinedi. Sondyqtan qazaqstandyqtar lotereıanyń bir bóligi bıýdjetti toltyrýǵa baǵyttalǵanyn bilse, senimdilikpen qarar edi», - dedi mınıstr.