Arystanbek Muhamedıuly: Máskeý festıvalindegi jeńis - bizdiń óner salasy úshin jarqyn oqıǵa
Kezdesý barysynda Arystanbek Muhamedıuly fılm rejısseri Farhat Sháripovti Halyqaralyq Máskeý kınofestıvalindegi jeńisimen quttyqtady.
«Bul - bizdiń óner salasy úshin, jalpy alǵanda Qazaqstan úshin jarqyn oqıǵa. Halyqaralyq Máskeý kınofestıvali - tarıhy baı, álemdegi eń eski festıvalderdiń biri ári jyl ótken saıyn tanymaldylyqqa ıe bolyp kele jatyr» - dep atap ótti mınıstr.
Kezdesý barysynda Farhat Sháripov mádenıet jáne sport mınıstrligine alǵys bildirip, jaqynda ótken kınofestıval jaıly áserimen bólisti. Sondaı-aq, aldaǵy josparlary týraly sóz qozǵady.
Esterińizge salsaq, rejısser Farhat Sháripovtyń «Tulǵalyq ósý trenıngi» fılmi Máskeý kınofestıvalinde Gran-prıge ıe bolǵan edi. Kartınany QR Mádenıet jáne sport mınıstrliginiń tapsyrysymen Sh. Aımanov atyndaǵy «Qazaqfılm» kınostýdııasy túsirgen. Fılmniń stsenarıi Danııar Súgiralınovtyń «Kırpıchı 2.0» romanynyń negizinde jazylǵan. «Úzdik fılm» nomınatsııasyndaǵy «Altyn Georgııdi» Sháripovke halyqaralyq qazylar alqasynyń tóraǵasy, tanymal koreıalyq rejısser Kım Kı Dýk tabystady.
Áleýmettik drama qyryq jasqa kelgen, orta jas kúızelisin keship júrgen bank qyzmetkeri Qanat týraly baıandaıdy. Birde Qanat tulǵalyq qalyptasý, kóshbasshylyq qasıetterdi damytý trenıngine barady. Koých-trener jetistikke qalaı jetý kerektigin jáne kóshbasshy bola bilýdiń ádisterin aıtady. Kóshbasshy bolýdyń qupııalaryn boıyna sińire kele, Qanat ózin jáne ómirge degen kózqarasyn ózgertýge bekinedi.
«Fılmniń jaryqqa shyǵýyna yqpal etken barsha adamǵa alǵys aıtamyn. Aldymen otbasyma myń alǵys. Sol sebepti bul jeńisimdi ákeme arnaımyn. Al festıval uıymdastyrýshylary men kórermenderine kóp rahmet», - dedi MHKF laýreaty Farhat Sháripov aǵynan jarylyp.
Fılmniń álemdik tusaýkeseri 23-shi Pýsan Halyqaralyq kınofestıvalinde ótken. Kartınanyń qorjynynda budan basqa taǵy eki birdeı júlde bar - 14-shi Halyqaralyq Sháken Aımanov kınofestıvalindegi Qazylar alqasynyń arnaıy júldesi jáne Netpak júldesi.
