Arystanbek Muhamedıuly «Etnoaýyldaǵy» kúıi ketken tazylardy baqylaýyna aldy
Aıta ketsek, budan buryn áleýmettik jelini qoldanýshylardyń biri Jora Morozov óz paraqshasynda kúıi ketken ıtterdiń vıdeosyn salǵan bolatyn. Qoldanýshynyń aıtýynsha, ol vıdeony «Qazanat» atshabary jaqta túsirgen.
Arystanbek Muhamedıuly atalǵan «Etnoaýyl» ulttyq-mádenı ortalyǵy aýmaǵynda («Qazanat» ıppodromy) eki tazynyń jaǵdaıy týraly búgin túnde kórgenin aıtady.
«Tańnan bastap jaǵdaıdy anyqtaýǵa kiristim. Mekeme balansynda birde-bir ıt joq. Itter turǵan qamaýlar «Etnoaýyl» aımaǵyndaǵy sharalarǵa qatysatyn syrttan ákeletin janýarlarǵa arnalǵan. Eki ıttiń de ıesi - Bekbolat esimdi jeke tulǵa, olardy Pavlodardan ákelipti. Onyń aıtýynsha, biraz ýaqyt buryn eki ıt qorshaýdan joǵalyp ketip, 10 kún izdestirýden keıin óte nashar jaǵdaıda qaıtarylypty. Itter joǵalǵany týraly polıtsııaǵa bergen aryzy bar», - dep jazady mınıstr.
Arystanbek Muhamedıulynyń nusqaýymen eki ıt te Astananyń veterınarlyq klınıkasynda tolyq medıtsınalyq zertteýden ótip, qajetti em qabyldaıtyn bolady.
«Veterınarlardyń qorytyndysy boıynsha, janýarlardyń jaǵdaıy qanaǵattanarlyq: tazy standartqa sáıkes aryq bolýy kerek. Biz ıtterdi istiń mán-jaıyn anyqtaǵansha sol jerde qaldyrý qajet dep sheshtik. Іshki qyzmettik tekserý bastaldy. Kináliler mindetti túrde jazalanatyn bolady. Itterdiń qojaıynymen kelisimshartty buzý týraly jáne Jora Morozovtyń operatsııaǵa jumsalǵan qarjysyn ustap qalý týraly sheshim qabyldandy», - deıdi Arystanbek Muhamedıuly.
Mınıstr tazylar týraly jazba avtoryna janýarǵa degen meıirimi men adamgershiligi úshin alǵys bildirdi.
«Janýarlarǵa mundaı qarym-qatynasqa jol bermeýimiz kerek. Biraq ıtterdiń ıesi bar ekenin eskerip, onyń jekemenshigin tartyp ala almaımyz. Qajet bolsa, quqyq qorǵaý uıymdaryna júginemiz. Eger qojaıynynan ıtterdi alatyn bolsa, «Etnoaýyl» olardy óz sapyna qabyldap, qaýipsiz jáne jaıly ómir súrýlerine jaǵdaı jasaýǵa daıyn», - deıdi mınıstr.
